یەکەم کۆبوونەوە بۆ جێبەجێکردنی پلانەکەی ترەمپ ئەنجام دەدرێت

ئاڤا نیوز

بڕیار وایە سبەی یەکشەممە کۆبوونەوەی شاندی نێوان ئیسرائیل و حەماس و ئەمریکا لە میسر بکرێت و تاوتوێی جێبەجێکردنی پلانەکەی ترەمپ بکەن. 

چیرۆکی سەرەکی: دوای ڕاگەیاندنی دەستپێشخەریەک لە لایەن دۆناڵد ترەمپ، سەرۆکی ئەمریکا بۆ کۆتاییهێنان بە جەنگ لە غەززە و ڕاگەیاندنی ڕێککەوتنامەی ئاشتی، بنیامین نەتانیاهۆ، سەرۆکوەزیرانی ئیسرائیل لە سەردانێکی فەرمیدا بۆ واشنتن قبووڵکردنی دەستپێشخەریەکەی ڕاگەیاند، شەوی ڕابردووش حەماس قبووڵکردنی دەستپێشخەریەکەی ڕاگەیاند.

بڵاوکراوەی فەرمی: کەناڵی 12ـی ئیسرائیلی لە ڕاپۆرتێکدا شوێنی یەکەم کۆبوونەوەی بۆ تاوتوێکردنی پلانەکەی دۆناڵد ترەمپ، سەرۆکی ئەمریکا ڕایگەیاند، بە پێی ڕاپۆرتەکە هەریەک لە ڕۆن دێرمەر، وەزیری کاروباری ستراتیژی ئیسرائیل و ستیڤ ویتکۆڤ، نێردەی تایبەتی سەرۆکی ئەمریکا بۆ کاروباری ڕۆژهەڵاتی ناوەڕاست گەشتوونەتە میسر و بڕیار وایە سبەی یەکەم کۆبوونەوە سەبارەت بە هەنگاوی یەکەمی پلانەکەی ترەمپ و ئازادکردنی بارمتەکان بکرێت.

زانیاریی زیاتر: بەپێی سەرچاوە دیپلۆماسیەکان ڕۆژی دووەمی کۆبوونەوەکان باس لە کشانەوەی تەواوەتی ئیسرائیل دەکرێت لە غەززە، پێشوەختە ئیسرائیل ئەمەی ڕەتکردووەتەوە و ئامادە نییە بە تەواوی بکشێتەوە، لەم قۆناغەدا چاوەڕوانی ڕۆڵی ئەمریکا دەکرێت بۆ ناچارکردنی ئیسرائیل بە ڕازیبوون بە مەرجەکان و کشانەوەی تەواوەتی لە غەززە.