ترەمپ: ئیسرائیل ڕەزامەندیی دەربڕیوە لەسەر هێڵی کشانەوەی سەرەتایی

ئاڤا نیوز

سەرۆکی ئەمریکا ڕایدەگەیێنێت،  هەر کاتێک حەماس هێڵی کشانەوەی ئیسرائیلی پشتڕاست کردەوە، دەستبەجێ ئاگربەستەکە دەچێتە بواری جێبەجێکردنەوە.

چیرۆکی سەرەکی: دوای ئەوەی حەماس ڕازی بوو بە پلانی نوێی ئەمریکا بۆ کۆتاییهێنان بە شەڕ، دۆناڵد ترەمپ، سەرۆکی ئەمریکا ڕایگەیاند، ئیسرائیل بە هێڵی سەرەتایی کشانەوە ڕازی بووە و کاتیێک حەماس کشانەوەکەی پشتڕاست کردەوە، ئاگربەست دەستپێدەکات و بارمتە ئیسرائیلییەکان ئازاد دەکرێن و ئاڵوگۆڕی دیلەکان دەستپێدەکات.

پەیامی فەرمی: دۆناڵد ترەمپ لە تۆڕی کۆمەڵایەتی ترووس ڕایگەیاند و وتی: دوای دانوستان، ئیسرائیل ڕازی بووە بە هێڵی سەرەتایی کشانەوە، کە ئێمە بۆ حەماس خستبوومانەڕوو و هاوبەشیمان لەگەڵیان کردووە، کاتێک حەماسیش ئەوەی پشتڕاست کردەوە، ئاگربەستەکە دەستبەجێ دەچێتە بواری جێبەجێکردنەوە و ئاڵوگۆڕی بارمتە و زیندانییەکان دەست پێدەکات، ئێمەش زەمینە بۆ قۆناغی داهاتووی کشانەوە دروست دەکەین، کە ئەمەش نزیکمان دەکاتەوە لە کۆتایی ئەم کارەساتە سێ هەزار ساڵەیە.

زانیاریی زیاتر: ئەوەش لە کاتێکدایە ڕۆژی شەممە بزووتنەوەی حەماس ئیسرائیلی تۆمەتبار کرد بەوەی کە لە ئۆپەراسیۆنەکانی بۆ سەر غەززە بەردەوامە و پابەندییەکانی بەرامبەر بە ئاگربەستەکە جێبەجێ نەکات، بنیامین نەتانیاهۆ، سەرۆکوەزیرانی ئیسرائیل پێش چەند کاتژمێرێک ڕایگەیاند پلانەکەی ترەمپ بارمتەکان دەگەڕێنێتەوە و     شاندی ئیسرائیل لە میسر وردەکاریی پلانی ترەمپ تاوتوێ دەکەن.