کۆمیسیۆن: هیچ پێشلکارییەک لە هەرێمی کوردستان تۆمار نەکراوە

ئاڤا نیوز

لەماوەی بانگەشەی هەڵبژاردن بۆ پەرلەمانی عێراق تاوەکو ئێستا هیچ پێشلکارییەک لە هەرێمی کوردستان تۆمار نەکراوە لەلایەن کۆمیسیۆنی هەڵبژاردنەکانی عێراقەوە.

وێنە گەورەکە: ڕۆژی هەینی، 2025-10-03 بانگەشە بۆ هەڵبژاردنی پەرلەمانی عێراق دەستیپێکرد و تا 2025-11-08 بەردەوام دەبێت، کۆمسیۆن ڕێنمایی و شێوازی بانگەشەی دیاری کردووە، لەهەر بازنەیەکی هەڵبژاردنیش لە چوارچێوەی ڕێنماییەکانی کۆمسیۆن ڕێنمایی تایبەت و ڕێکاری پێویستە دەگرنەبەر.

لێدوانی فەرمی: نەبەرد عومەر، بەرپرسی دەستەی هەڵبژاردنەکانی کوردستان میوانی کاتژمێری 12ی ئاڤا میدیا بوو و ڕایگەیاند: بەشێوەیەکی گشتیی لەسەرەتای پڕۆسەی بانگەشەی هەڵبژاردنەوە چەند کاندید و لایەنێک لە خواروو و ناوەڕاستی عێراق پێشلکارییان ئەنجامداوە و تەنانەت کاندیدیش هەبووە دوورخراوەتەوە. 

- پڕۆسەکە لە هەرێمی کوردستان بەشێوەیەکی زۆر باش بەڕێوە دەچێت، تاوەکو ئێستا هیچ پێشێلکارییەک تۆمار نەکراوە. 

- داوامان لەلایەن سیاسییەکان و کاندیدان کردووە موڵک و ماڵی دەوڵەت بەکارنەهێنن بۆ بانگەشەی هەڵبژاردن و نابێت کاندیدان قسەی نەشیاو بەیەکتری بڵێن.

گۆشەیەکی دیکەی دیمەنەکە: بەرپرسی دەستەی هەڵبژاردنەکانی کوردستان باسی لەوەکرد: بۆ بانگەشەی ئەمجارە لایەنە سیاسییەکان بەچڕی کار لەسەر سۆشیاڵ میدیا دەکەن، هەر بۆیە لیژنەیەکی تایبەتمان پێکهێناوە بۆ چاودێرکردنی سۆشیاڵ میدیا تاوەکو ئەو کەسانەی سەرپێچی دەکەن ڕووبەڕووی سزای یاساییان بکەینەوە.