لە نۆ مانگدا هەزار و 175 کەس لە ڕۆژهەڵاتی کوردستان و ئێران لەسێدارەدراون

ئاڤا نیوز

کۆمیسیۆنی ئافرەتان لە ئەنجوومەنی نیشتمانی بۆ داکۆکیکردن لە مافەکانی مرۆڤ لە ئێران، ڕایدەگەیێنێت لە ماوەی نۆ مانگی ڕابردوودا هەزار و 175 کەس لە ڕۆژهەڵاتی کوردستان و ئێران لەسێدارەدراون، کە 38 ـیان ئافرەتن.

زانیاریی بەدەستهاتوو: بەپێی دوایین ڕاپۆرتی کۆمیسیۆنی ئافرەتان لە کۆی ئەو ژمارەیە 38 ـیان ئافرەتن و تەنیا لە ماوەی دوو مانگدا واتا لە 2025-07-30 بۆ 2025-09-30، 14 ئافرەت لەسێدارەدراون.

بەپێی زانیارییەکانی کۆمیسیۆنەکە لە هەر چوار ڕۆژدا، ژنێک لە ڕۆژهەڵاتی کوردستان و ئێران لەسێدارە دەدرێت.

هۆکارە زانراوەکان: کۆمیسیۆنەکە زیادبوونی لەسێدارەدانی ئافرەتان بۆ ئەوە دەگێڕێتەوە، ئافرەتان ڕۆڵی پێشەنگانە دەگێڕن لەو خۆپیشاندانانەی لە ئێران و ڕۆژهەڵاتی کوردستان ئەنجام دەدرێن.

ژمارەکان وا دەڵێن: ساڵی ڕابردوو 34 ئافرەت؛ ساڵی 2023، 26 ئافرەت؛ ساڵی 2022، 15 ئافرەت لە سێدارە دراون. لە 2007 ـەوە تاوەکو ئێستا زیاتر لە 300 ژن لە رۆژهەڵاتی کوردستان و ئێران لە سێدارە دراون.