لە ئیدارەی ڕاپەڕین خۆتۆماركردن لە پڕۆژەی ڕووناكی و دانانی پێوەری زیرەك دەستیپێكرد

ئاڤا نیوز

ئەمڕۆ لە سنووری ئیدارەی ڕاپەڕین، دەستكرا بە دابەشكردنی فۆرمی خۆتۆماركردن لە پڕۆژەی ڕووناكی، بەڕێوەبەری كارەبای ڕاپەرینیش تایبەت بۆ ئاڤا دەڵێت، دەستیان كردووە بە دانانی پێوەری زیرەك و كارە تەكنیكییەكانی دیكە، بۆ ئەوەی لەنزیكترین كاتدا پڕۆژەكە لەو دەڤەرە جێبەجێ بكرێت.

چیرۆکی سەرەکی: پڕۆژەی ڕووناكی بۆ دابینكردنی كارەبای 24 كاتژمێری لە هەر چوار پارێزگاكەی هەرێمی كوردستان گەیشتووەتە قۆناغی كۆتایی و لە ئایندەیەكی نزیكیشدا لە هەر سێ ئیدارە سەربەخۆكانی زاخۆ، سۆران و ڕاپەڕین جێبەجێ دەكرێت.

لێدوانی فەرمی: عەلی محەممەد، بەڕێوبەری گشتیی کارەبای ڕاپەڕین بە ئاڤای وت،، ئیدارەی ڕاپەڕین لەڕووی هونەرییەوە بەتەواوی بۆ پڕۆژەی ڕووناكی ئامادەیە، بەو پێیەی ماوەی نزیكەی دوو مانگە بەهەماهەنگی لەگەڵ تیمەكانی پڕۆژەی ڕووناكی ئامادەكاریی پێویستیان كردووە بۆ ڕاكێشانی كارەبای 24 كاتژمێری، لە ئەمڕۆ یەكشەممەوە، تیمەكانی پڕۆژەكە بەمەیدانی دەستبەكاربوونە و لە ڕۆژانی داهاتوودا ماڵ بەماڵ و هەموو شوێنە بازرگانییەكان بەسەردەكەنەوە، نامیلكە و فۆرمی خۆتۆماركردن بەسەر هاونیشتمانیانی سنوورەكە دابەش دەكەن.

بەڕێوەبەری كارەبای ڕاپەڕین ئاماژەی بەوەشكرد، تیمێکی دیکەی پڕۆژەی ڕووناکی، دەستیان بە دانانی پێوەری زیرەک و چاككردنەوەی بگۆڕەكانی كارەبا كردووە، بەڕێوەبەرایەتیی كارەبای ڕاپەڕین بۆ لەخۆگرتنی پڕۆژەكە بەتەواوی ئامادەیە و كارە تەكنیكییەكان لەنزیكترین كاتدا جێبەجێ دەكرێن.

ئەوەی پێویستە بیزانیت: لەسنووری ئیدارەی راپەڕین، 110 هەزار هاوبەشی کارەبا هەیە كە 90%ـی هاوبەشانی كارەبا لەماوەی ڕابردوودا پێوەری زیرەكیان بەستووە.