شاندی ئیسرائیل و حەماس کۆدەبنەوە؛ ترەمپیش گەشبینە

ئاڤا نیوز

سەرۆکی ئەمریکا لەبارەی پلانی ئاشتی بۆ غەززە و بەڕازیبوونی هەردوو لایەنی ئیسرائیل و حەماس گەشبینە، ئاشكرای دەکات بەرەوپێشچوونی خێرا هەیە، هەر ئەمڕۆ شاندی دانوستانکاری حەماس و ئیسرائیل لەسەر ئەم پرسە کۆدەبنەوە.

وێنە گەورەکە: دوای پەسندکردنی پلانەکەی ترەمپ لەلایەن هەریەکە لە ئیسرائیل و حەماس لەبارەی غەززە، هەنگاوەکان بۆ جێبەجێکردنی خاڵەکانی پلانەکە بەردەوامن، ئەمڕۆش یەکەم کۆبوونەوەی شاندی دانوستانکاری هەردوولا دەکرێت.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، دانوستانە بەردەوامەکان لەگەڵ حەماس بۆ کۆتاییهێنان بە شەڕ لە غەززە و ئازادکردنی بارمتەکان بەرەوپێشچوونی خێرا بەخۆیەوە دەبینێت. هاوکات ئاماژەی بەوەشکرد، ئەمڕۆ دووشەممە، تیمە تەکنیکیەکان جارێکی دیکە لە میسر کۆدەبنەوە بۆ گفتوگۆکردن و کۆتاییهێنان بە وردەکارییەکان ئاگادار کرامەوە کە بڕیارە قۆناغی یەکەم لەم هەفتەیەدا تەواو ببێت، داوا لە هەموو لایەک دەکەم بە خێرایی هەنگاو بنێن.

ترەمپ وتیشی، حەماس هەندێک بەشە سەرەکییەکانی پلانە 20 خاڵەکەی قبووڵ کردووە، لەوانە کۆتاییهێنان بە شەڕ، کشانەوەی ئیسرائیل لە کەرتی غەززە و ئازادکردنی بارمتەکان.

لەلایەکی دیکەوە: مارکۆ ڕۆبیۆ، وەزیری دەرەوەی ئەمریکا ڕایگەیاند، 'هێشتا شەڕی غەززە کۆتایی نەهاتووە، سەرەڕای ئەوەی ئیسرائیل و حەماس بە بەشێک لە پلانی ترەمپ ڕازیبوون، هاوکات بۆردوومانەکانی ئیسرائیل بۆ سەر کەرتی غەززە دەبێت بوەستێت، ئاماژەشی بەوەکرد، نیازی حەماس لەم دانوستانەدا دەردەکەوێت ئایا تاوەکو چەند جددیە و ئارەزووی ڕاگرتنی شەڕی هەیە".

ئەوەی ئێستا ڕوودەدات: بەرپرسێکی فەڵەستینی و سێ سەرچاوەی ئیسرائیلی ئاشکرایان کرد، بڕیارە ئەمڕۆ دووشەممە دانوستانی تەکنیکی ناڕاستەوخۆی نێوان شاندی ئیسرائیل و حەماس لە میسر، لە بارەی ڕاگرتنی شەڕ لە کەرتی غەززە دەست پێبکات، گفتۆگۆ لەبارەی پلانی ئاشتی ترەمپ دەکەن.