ئاڤای خەڵک؛ مامۆستا و فەرمانبەرانی دەوامی ئێوارانی زانکۆی پۆلیتەکنیکی هەولێر نیگەرانن لە خەرجنەکردنی شایستە داراییەکانیان

ئاڤا نیوز

مامۆستا و فەرمانبەرانی دەوامی ئێواران لە زانکۆی پۆلیتەکنیکی هەولێر گلەیی لە خەرجنەکردنی شایستەی دارایی دوو مانگیان دەکەن، بەڕێوەبەری کارگێڕی و خۆیەتی زانکۆکەش لەوبارەوە دەڵێت، ئەم هەفتەیە پارەی مانگێکیان بۆ خەرج دەکرێت.

چیرۆکی سەرەکی: مامۆستایانی هەمیشەیی و گرێبەست و فەرمانبەرانی زانکۆی پۆلیتەکنیکی هەولێر کە دەوامی ئێوارانیان کردووە، تاوەکو ئێستا شایستەی دارایی مانگەکانی پێنج و شەشی ئەمساڵیان بۆ خەرج نەکراوە، هەرچەندە چەکی پارەکەش ئامادەیە، بەڵام بە بیانووی ڕاگرتنی خەرجییەکان لەلایەن وەزارەتی داراییەوە، خەرج نەکراوە.

لێدوانی فەرمی: سەرمەند بەرزنجی، بەڕێوەبەری کارگێڕی و خۆیەتی زانکۆی پۆلیتەکنیکی هەولێر بە ئاڤای ڕاگەیاند: کاری لە پێشینەی حکومەتی هەرێمی کوردستان کۆکردنەوەی داهات و چارەسەرکردنی کێشەکانی نێوان هەولێر و بەغدا بووە، بەگوێڕەی بڕیاری ئەنجوومەنی وەزیران دەبێت سەرجەم ئەو داهاتەی هەمانە بیگەڕێنینەوە بۆ بانکی زانکۆ، کە سەر بە وەزارەتی دارایی و ئابوورییە، 30%ـی داهاتەکە بۆ حکومەت و 70%ـی بۆ زانکۆ دەگەڕێتەوە.

زانیاریی زیاتر: زانکۆکان لەو 70%ـی داهات، پڕۆژەکان و شایستەی دارایی مامۆستایان و وانەبێژ و فەرمانبەران دابین دەکەن.

لەلایەکی دیکەوە: سەرمەند بەرزنجی دەڵێت، تا دوو ڕۆژی داهاتوو شایستەی دارایی مانگی پێنجی ئەو مامۆستا و فەرمانبەرانە خەرج دەکەین،  بەڵام بۆ شایستەی مانگی شەش هەندێک گرفتمان لەگەڵ وەزارەتی دارایی و ئابووری هەیە، ئێمە سیولەمان لە بانک هەیە و پێمان نادەن، بەڵام هەوڵدەدەین ئەوەش لە زووترین کاتدا چارەسەر بکەین.

ژمارەکان وا دەڵێن: کۆی گشتی شایستەی دارایی بۆ مانگی پێنجی مامۆستا و فەرمانبەرانی دەوامی ئێوارانی زانکۆی پۆلیتەکنیکی هەولێر، بڕەکەی 142 ملیۆن و 500 هەزار دینارە.