زیاتر لە 600 خاوەنكار پێویستییان بە كارخوازانی ناوخۆیی هەیە

ئاڤا نیوز

لە ماوەی چەند مانگی ڕابردوودا سەدان كارخواز لەڕێگەی "پۆرتاڵی کار" توانیویانە کاری دڵخوازی خۆیان بدۆزنەوە. زیاتر لە 600 خاوەنكاریش پێویستییان بە دەستی كاری ناوخۆیی هەیە و بۆ ئەم مەبەستە ئەكاونتی تایبەت بە خۆیان لە پۆرتاڵەكە كردووەتەوە.

وێنە گەورەكە: كابینەی نۆیەمی حكومەتی هەرێمی كوردستان، كارئاسانی زۆری بۆ ڕەخساندنی دەرفەتی كاری زیاتری بۆ كارخوازان كردووە، لەو چوارچێوەیەشدا لەڕێگەی بەڕێوەبەرایەتیی كار و دەستەبەری كۆمەڵایەتی لە وەزارەتی كار و كاروباری كۆمەڵایەتی، ماوەی چەند مانگێكە خزمەتگوزاریی پۆرتاڵی كاری خستووەتە بەردەست كارخوازان و، ئەوانەی بەدوای كاردا دەگەڕێن، دەتوانن لەڕێگەی https://kar.molsa.gov.krd/Home كاری دڵخوازی خۆیان بدۆزنەوە.

ئەوەی پێویستە بیزانیت: زیادبوونی دەرفەتی كار بۆ دەستی كاری ناوخۆیی، دوای تووندكردنی ڕێككارەكانی هێنان و مانەوەی كرێكارانی بیانی دێت، بەتایبەت ئەوانەی مافی نشینگە و كاركردنیان لە هەرێمی كوردستان تەواوبووە و بەهەر هۆكارێك بێت ڕێگە بە نوێكردنەوەی مۆڵەتی كاركردنیان نادرێت.

لێدوانی فەرمی: ئەردەلان محێدین، بەرپرسی پشكنینی كار و بەشدارییەكانی دەستەبەری كۆمەڵایەتی، بە ئاڤای ڕاگەیاند، لەگەڵ بەردەستبوونی پۆرتاڵی كار، زیاتر لە دووهەزار و 200 هاونیشتمانی، ئەكاونتی تایبەت بە خۆیان لەم پۆرتاڵەدا كردووەتەوە، هاوكات 600 خاوەنكاریش ئەكاونتی خۆیان هەیە و پێویستییان بە دەستی كاری ناوخۆییە.

ئاماژە بەوەشدەكات، تا ئێستا سەدان كارخواز لە ڕێگەی پۆرتاڵی https://kar.molsa.gov.krd/Home كاریان دۆزیوەتەوە، هاوكات پێشبینیش دەكات لەگەڵ دیپۆرتكردنەوەی كرێكارانی بیانی، دەرفەتی زیاتری كاركردن بۆ دەستی كاری ناوخۆیی بڕەخسێت.