توركیا ڕاگرتنی گەشتەكانی بۆ فڕۆكەخانەی سلێمانی سێ مانگ درێژکردەوە

ئاڤا نیوز

توركيا ماوەی ڕاگرتنی گەشتە ئاسمانییەكانی بۆ فڕۆكەخانەی نێودەوڵەتیی سلێمانی بۆ سێ مانگی دیكە درێژ كردەوە، وەزارەتی گواستنەوە و گەیاندنیش دەڵێت، بابەتی گەشتی ئاسمانی و مۆڵەتی فڕینی فڕۆكە لەنێوان دوو وڵات، لە دەسەڵاتی دەستەی فڕۆکەوانی مەدەنی عێراقە.

وێنە گەورەكە: زیاتر لە 30 مانگە توركیا گەشتە ئاسمانییەكانی لەگەڵ فڕۆكەخانەی سلێمانی ڕاگرتووە، ئەوكات هۆكارەكەی بۆ ئەوە گەڕاندەوە، گوایا پەكەكە دزەی كردووەتە نێو فڕۆكەخانەكە و ئەوەش هەڕەشەیە بۆ سەر ئاسایشی گەشتە ئاسمانییەكان، سەرەڕای هەوڵە دیپلۆماسییەكان بۆ ئاساییكردنەوەی گەشتەكانی نێوان توركیا و سلێمانی، كەچی تاوەكو ئێستا چەند جارێك ماوەی ڕاگرتنەكە درێژ كراوەتەوە و نازانرێت دوای ئەو وادەیە بڕیاری توركیا چی دەبێت.

ئاگادارینامەی فەرمی: بەگوێرەی ئاگادارینامەیەكی دەسەڵاتی فڕۆكەوانی شارستانیی توركیا، بڕیاری ماوەی ڕاگرتنی گەشتە ئاسمانییەكان و ئاسمانی وڵاتەكەی بەڕووی گەشتەكانی فڕۆكەخانەی نێودەوڵەتیی سلێمانی، تاوەكو ڕۆژی 2026-01-06 درێژكردووەتەوە و لەمبارەیەوە، بەشی پەیوەندییە گشتییەكان و ڕاگەیاندنی فڕۆكەخانەی نێودەوڵەتیی سلێمانی، هاونیشتمانیان ئاگادار دەكاتەوە.

زانیاریی بەدەستهاتوو: سەرچاوەیەك لە وەزارەتی گواستنەوە و گەیاندنی حكومەتی هەرێمی كوردستان تایبەت بۆ ئاڤا ڕوونیكردەوە، تەنیا ئیدارەدانی فرۆكەخانەكان لە دەسەڵاتی وەزارەتی گواستنەوە و گەیاندنە، بەڵام بابەتی گەشتی ئاسمانی و مۆڵەتی فڕینی فڕۆكە لەنێوان دوو وڵات، لە دەسەڵاتی دەستەی فڕۆکەوانی مەدەنی عێراقە بەپێی دەستوور و لە دەسەڵاتی وەزارەتی گواستنەوە و گەیاندنی هەرێمی کوردستان نییە تا داوا بكات توركیا گەمارۆ لەسەر فڕۆكەخانەی نێودەوڵەتیی سلێمانی هەڵبگرێت.