هێرشی ئەلیکترۆنی 30 ڕۆژە ناهێڵێت "جاگوار" یەک ئۆتۆمبێلیش بەرهەم بهێنێت

ئاڤا نیوز

مانگێکە "جاگوار لاند ڕۆڤەر" کە گەورەترین کۆمپانیای بەرهەمهێنانی ئۆتۆمبێلە لە بەریتانیا، هیچ ئۆتۆمبێلێکی بەرهەم نەهێناوە و ئەمەش ڕۆژانە ملیۆنان پاوەند زیان بە کۆمپانیاکە دەگەیەنێت و کاریگەری خراپ دەکاتە سەر هەزاران کارمەند و دابینکەرانی ئۆتۆمبێل.

وێنە گەورەکە: دوای ئەوەی جاگوار لاند ڕۆڤەر بۆی دەرکەوت لە 2025-09-01 هێرشی سایبەری کراوەتە سەر کۆمپانیاکە، بەرهەمهێنانی ئۆتۆمبێلی لە بەریتانیا، بەڕازیل، چین، هیندستان و سلۆڤاکیا ڕاگرت. مەزەندە دەکرێت بۆ کێشانەوەی پارە لە کۆمپانیاکە ئەم هێرشە ئەنجام درابێت.

ڕاگەیێنراوی فەرمی: کۆمپانیاکە ڕایگەیاندووە لە چەند ڕۆژی داهاتوودا سەرلەنوێ دەست دەکەنەوە بە بەرهەمهێنانی ئۆتۆمبێل و ڕایگەیاندووە، پرۆسەی خۆڕێکخستنەوە زۆر بە باشی بەرەوپێش دەچێت.

بە تەنیشت ئەم بابەتەوە: ‌حکومەتی بەریتانیا بۆ هاوکاریکردنی جاگوار لاند ڕۆڤەر بڕیاری داوە بەبەهای 1،5 ملیار پاوەند قەرز بەو کۆمپانیایە بدات.

ئەوەی پێویستە بیزانیت: هێرشەکانی سایبەر تەنیا کەرتی پیشەسازی نەگرتووەتەوە، بەڵکو زنجیرە مارکێتەکانی ئەم وڵاتەشی گرتووەتەوە و بەم هۆیەوە زنجیرە مارکێتەکان ناچار بوون فرۆشتنی بەرهەمەکانیان بە ئۆنلاین ڕابگرن. ئەمەش بە بەهای ملیۆنان پاوەند زەرەری پێگەیاندوون.