سوودانی پیرۆزبایی جەژنی "جەما" لە کوردانی ئێزدی دەکات

ئاڤا نیوز 

بە بۆنەی  جەژنی "جەما"، سەرۆکوەزیرانی عێراق، پیرۆزبایی لە کوردانی ئێزیدی لە ناوخۆ و دەرەوەی وڵات دەکات و پشتگیریی حکومەتەکەی بۆ پێکهاتە ڕەسەنەکانی عێراق دووپات دەکاتەوە.

چیرۆکی سەرەکی: جەژنی "جەما" یەکێکە لە دیارترین بۆنە ئایینییەکانی کوردانی ئێزیدی و ساڵانە لە شەشی تشرینی یەکەم لە پەرستگای لالش ڕێورەسمی ئەم جەژنە لە قەزای شێخان بەڕێوەدەچێت و ژمارەیەکی زۆر لە کوردانی ئێزیدی لە ناوەوە و دەرەوەی عێراقەوە بۆ ئەنجامدانی ڕێورەسمی ئایینی و کۆمەڵایەتیی تایبەت بەم جەژنە،  ڕوو لە پەرستگاکە دەکەن.

ڕاگەیێنراوی فەرمی: لە پەیامێکی پیرۆزباییدا کە لە تۆڕی کۆمەڵایەتی ئێکس بڵاویکردەوە، محەممەد شیاع سوودانی، سەرۆکوەزیرانی عێراق ڕایگەیاند: حکومەت گرنگییەکی تەواوی بە پێکهاتە ڕەسەنەکانی عێراق داوە، لە سەروویانەوەش پێکهاتەی ئێزیدی، ئەمەش لە ڕێگەی چەسپاندنی مافە دەستووریی و چالاکییە ئایینی و ڕۆشنبیرییەکانیان. 

زانیاریی زیاتر: سوودانی جەختی لەوەش کردەوە، ئەم بۆنەیە نیشانەی شارستانیەت و فرەچەشنی ڕۆشنبیریی عێراق ئاشکرا دەکات، کە هاوکات سەرچاوەی هێز و شانازیی نیشتمانییە بۆ هەموو عێراقییەکان.