لە حەلەب هێزە ئەمنییەکان گازی فرمێسک ڕێژ دژی خۆپیشاندەرانی کورد بەکاردەهێنن

ئاڤا نیوز

دوای ئەوەی ئێوارەی ئەمڕۆ سەرجەم دەروازەکانی هاتووچۆیان بەڕووی هەردوو گەڕەکی شێخ مەقسود و ئەشرەفییەی حەلەب داخست، دانیشتووانی کوردی ئەو دوو گەڕەکە لەبەردەم بازگەی هێزەکانی حکومەتی سووریا گردبوونەوەی ناڕەزاییان ئەنجامدا و ئەو هێزانەش بەدەستڕێژی گولـلەی هەوایی و گازی فرمێسک ڕێژ  وەڵامیان دانەوە.

وێنە گەورەکە:  ئێوارەی ئەمڕۆ  هێزەکانی حکومەتی سووریا گەڕەکەکانی شێخ مەقسود و ئەشرەفیەیان لە ناوەندی شاری حەلەبی باکووری سووریا "ئابڵوقە" دا و هەموو دەروازەکانی هاتووچۆیان داخست.

زانیاریی بەدەستهاتوو: میدیای ڕۆژئاوای کوردستان بڵاویکردەوە، دوای داخستنی دەروازەکان، دانیشتووانی هەردوو گەڕەکە کوردییەکە خۆپیشاندانیان ئەنجامدا و هێزە ئەمنییەکانی سەر بە دیمەشق بە بەکارهێنانی دەستڕێژی گولـلەی هەوایی و گازی فرمێسک ڕێژ  وەڵامیان دانەوە، لە ئەنجامیشدا دەیان خۆپیشاندەر بەهۆی گازی فرمێسک ڕێژەوە برینداربوون و ڕەوانەی نەخۆشخانە کراون.

خۆپیشاندەرانی کورد داوایان دەکرد ڕێگا و دەروازەکان بکرێنەوە و کێشەکان بەگفوگۆ و دانوستان چارەسەر بکرێن.