بە گوژمەی نزیکەی 100 ملیۆن دینار ڕێگای ده‌روازه‌ی شه‌قڵاوه‌ نۆژه‌ن ده‌كرێته‌وه

ئاڤا نیوز

بەمەبەستی ڕێکخستنەوە و سیمایه‌كی جوانتر بە شارەکە، دەروازەی شەقڵاوە به‌ ئاراسته‌ی شاری هه‌ولێر نۆژەن دەکرێتەوە.

لێدوانی فەرمی: کاروان کەریم خان، قایمقامی شەقڵاوە بە ئاڤا میدیای ڕاگەیاند، له‌سه‌ر بودجه‌ی سه‌رۆكایه‌تیی شاره‌وانیی شه‌قڵاوه‌ و به ‌مه‌به‌ستی جوانكاری و ڕێكخستنه‌وه‌ی ده‌روازه‌ی قەزاكە به‌ ئاراسته‌ی شاری هه‌ولێر، پڕۆژه‌ی دانانی كربستۆن و نۆژه‌نكردنه‌وه‌ی ده‌روازه‌كه‌ بە گوژمەی نزیکەی 100 ملیۆن دینار جێبه‌جێ ده‌كرێت.

دەشڵێت، به‌ ته‌واوبوونی پڕۆژه‌كه‌‌، سیمایه‌كی جوانتر به‌ شاره‌كه‌ ده‌به‌خشرێت و ئاستی خزمه‌تگوزارییه‌كانیشی به‌رزتر ده‌بێته‌وه‌.

زانیاریی زیاتر: لەماوەی ڕابردوودا، بە چەند قۆناغێک شۆستەی ناوەند و هێڵکاری شەقام و بۆیەکردنەوەی شۆستەکانی ناوەندی شاری شەقڵاوە ئەنجام دراوە.

هاوکات، لەماوەکانی ڕابردوو هەوڵی سەوزایی و هەڵمەتی چاندنی دار دراوە، ئەو هەڵمەتە بەردەوامی پێ دەدرێت.

ئەوەی پێویستە بیزانیت: شاری شه‌قڵاوه وێڕای نیشته‌جێبوونی ژماره‌یه‌كی زۆری دانیشتووان‌، هاوكات یه‌كێكه‌ له‌ ناوچه گه‌شتیارییه‌كانی پارێزگای هه‌ولێر و ڕۆژانه‌ زۆرترین ژماره‌ی گه‌شتیاری ناوخۆی هه‌رێمی كوردستان و پارێزگه‌كانی دیكه‌ی عێراق سه‌ردانی ده‌كه‌ن.