لەم مانگە پڕکردنەوەی پسوولەی ئەلیکترۆنی خۆراک دەست پێدەکاتەوە

ئاڤا نیوز

ئەپڵیکەیشنی پسوولەی خۆراک لە هەرێمی کوردستان کارا دەکرێتەوە، لەم قۆناغە داهاتوو هاووڵاتییان جگە لە خۆتۆمارکردن دەتوانن چەند مامەڵەیەکی دیکە لەنێو ئەپڵیکەیشنەکە ئەنجام بدەن.

وێنە گەورەکە: بەهۆی پڕنەکردنەوەی پسوولەی خۆراکی ئەلیکترۆنی 700 هەزار کەس بەشە ئارد و خۆراکی چەند مانگێکیان بڕاوە و وەریان نەگرتووە، چاوەڕێن فۆڕمەکە کارابکرێتەوە و بەشەخۆراک وەرگرن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی؛ بەئاڤای گوت، "تیمێکی تەکنیکی لە بەغداوە هاتوون و چەند ڕۆژێکە ڕاهێنان بە تیمەکانی وەزارەتی بازرگانی هەرێمی کوردستان دەکەن، پێش کۆتایی هاتنی ئەم مانگە پرۆسەکە دەستپێدەکاتەوە، هاووڵاتیان دەتوانن خۆیان تۆماربکەن."

ئەمەش بزانە: لە قۆناغی دووەم هاووڵاتیان لەچەند خزمەتگوزارییەک سوودمەند دەبن، کە تۆماركردنی ناوی منداڵ و گواستنەوەی پسوولە لە بریكارێك بۆ بریكارێك یان لە شارێك بۆ شارێك، هەروەها تۆماركردنی ئەو كەسانەی كە هاوسەرگیریان كردووە و پسوولەی خۆراكیان نییە یان ئەوانەی كە لە دەرەوەی وڵاتن و بواریان نەبووە بگەڕێنەوە پسوولەكانیان تازە بكەنەوە.

زانیاریی زیاتر: لە كۆی پێنج ملیۆن و  385 هەزار و  820 كەس كە پسوولەی خۆراكیان هەیە، چوار ملیۆن و 187 هەزار و 124 كەس پسوولەكانیان كردووەتە ئەلیکترۆنی.