مەزڵووم عەبدی بۆ کۆبوونەوە لەگەڵ ئەحمەد شەرع گەیشتە دیمەشق

ئاڤا نیوز

دوای شەڕ و پێکدادانەکەی دوێنێ نێوان هەسەدە و سوپای سووریا لە حەلەب، شاندێکی ئیدارەی خۆسەر بە سەرۆکایەتیی مەزڵووم عەبدی بەمەبەستی ئەنجامدانی کۆبوونەوەیەک لەگەڵ ئەحمەد شەرعی سەرۆکی سووریا گەیشتە دیمەشق.

چیرۆکی سەرەکی: درەنگانی شەوی ڕابردوو، شەڕ لەنێوان هێزەکانی سووریای دیموکرات (هەسەدە) و سوپای سووریا لە هەردوو گەڕەکی کوردنشینی شێخ مەقسوود و ئەشرەفییە لە پارێزگای حەلەب ڕوویدا، بەهۆیەوە چەندین هاووڵاتیی مەدەنی و سەربازی گیانیان لەدەستدا و برینداربوون، دواتر هەردوولا ڕێککەوتنی ئاگربەستیان واژۆ کرد.

لێدوانی فەرمی: ساڵح موسلیم، ئەندامی دەستەی سەرۆکایەتیی پارتی یەکێتی دیموکرات (پەیەدە) بە ئاڤا میدیای ڕاگەیاند: ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەر و ڕوهلات عەفرین، فەرماندەی یەکینەکانی پاراستنی ژنان (یەپەژە) و یاوەریی مەزڵووم عەبدی دەکەن.

زانیاریی زیاتر: دانوستانی نێوان ئیدارەی خۆسەر و حکومەتی سووریا لە چوارچێوەی هەوڵە بەردەوامەکان بۆ جێبەجێکردنی مەرجەکانی ڕێکەوتنی 10ی ئادار کە لە نێوان مەزڵووم عەبدی، فەرماندەی گشتیی هەسەدە و ئەحمەد شەرع، سەرۆکی سووریا واژۆ کراوە.

پەیوەست بەم بابەتەوە: ئێوارەی ڕۆژی دووشەممە، مەزڵووم عەبدی، وردەکاریی کۆبوونەوەکەی لەگەڵ تۆم باراک، نێردەی تایبەتی ئەمریکا بۆ سووریا و براد کوپەر، فەرماندەی فەرماندەیی ناوەندیی ئەمریکا کۆبووەوە و چەندین پرسی ناوخۆی سووریا تاوتوێ کراون و بە وتەی باراک، "گفتوگۆی بنەڕەتی و گرنگ" کراوە.