باخچەلی بۆ ئۆجەلان: داوا لە هەسەدە بکە چەک دابنێت و تێکەڵی سوپای سووریا ببێت

ئاڤا نیوز 

دوای نزیکەی یەک ساڵ بەسەر داواکارییەکەی یەکەمیدا کە داوای لە عەبدوڵڵا ئۆجەلان کرد پەکەکە هەڵبوەشێنێتەوە و چەکی پێدا بنێت، ئێستا دەوڵەت باخچەلی، سەرۆکی گشتیی مەهەپە داوای لێ دەکات چەک بە هەسەدەش دابنێت و ڕازی بێت بە تێکەڵبوون لەگەڵ سوپای نوێی سووریا.

لێدوانی فەرمی: دەوڵەت باخچەلی ئەمڕۆ 7.10.2025 لە کۆبوونەوەی فراکسیۆنی پارتەکەی لە پەرلەمانی تورکیا داوای لە ئۆجەلان کرد، هاوشێوەی ئەوەی لە 27.2.2025 داوای لە پەکەکە کرد چەک دابنێت و خۆی هەڵبوەشێنێتەوە، هەمان داواکاریش لە هەسەدە بکات ڕازی بێت بە تێکەڵبوون لەگەڵ سوپای نوێی سووریا.

بە تەنیشت ئەم بابەتەوە: باخچەلی ئاماژەی بەوە دا ئەگەر پێویست بکات دەکرێت شاندێک لەو کۆمیسیۆنەی بۆ ڕەخساندنی زەمینەسازی یاسایی بۆ پرۆسەی ئاشتی لە پەرلەمان پێکهێنراوە سەردانی ئۆجەلان بکات و لە زاری یەکەمەوە پەیامی ئۆجەلان ببیستن و بە ڕایگشتی ڕایبگەیەنن و دەڵێت: "ئەمە پێویستی بە سڵەمڵینەوە نییە".

پێویستە ئەمەش بزانیت: داواکارییەکەی باخچەلی لە کاتێکدایە، 22.10.2024 ڕایگەیاند ئەگەر ئۆجەلان ئامادە بێت چەک بە پەکەکە دابنێت و پەکەکە هەڵبوەشێنێتەوە ئەوا زەمینەسازی دەکەن بۆ ئەوەی یاساکان بە جۆرێک هەموار بکرێنەوە ئۆجەلان لە مافی هیوا سوودمەند بێت و بە مەرج ئازاد بکرێت.