ساڵح موسلیم: لە ئەشرەفییە و شێخ مەقسوود شەهید و بریندارمان هەیە

ئاڤا نیوز

بەوتەی ساڵح موسلیم، لە شەڕ و ڕووبەڕووبونەوەکانی دوێنێی هەردوو گەڕەکی ئەشرەفییە و شێخ مەقسوود دوو کەس شەهیدن و 60 کەسیش بریندارن.

وێنە گەورەکە: لەماوەی دوو ڕۆژدا شەڕ و ڕووبەڕووبونەوەی گەورە لەنێوان ئاسایشی ناوخۆیی و خەڵکی هەردوو گەڕەکی ئەشرەفییە و شێخ مەقسود و هێزەکانی نزیک لە دیمەشق ڕوویداوە. لەلایەن هێزەکانی سەر بە حکومەتی سووریا بە چەکی قوورس هێرش کرایە سەر هەردوو گەڕەکەکە.

لێدوانی فەرمی: ساڵح موسلیم، ئەندامی ئەنجومەنی هاوسەرۆکی پەیەدە بە ئاڤا میدیای ڕاگەیاند، لەو هێرشەی دوێنێی هێزەکانی حکومەتی سووریا بۆسەر دوو گەڕەکە کوردییەکەی حەلەب، دوو کەس شەهید بوون و 60 کەسیش بریندارن.

ساڵح موسلیم دەشڵێت: ئەمڕۆ شاندێک بە سەرۆکایەتی مەزڵوم عەبدی، فەرماندەیی هێزەکانی سووریای دیموکرات و ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەر و ڕۆهلات عەفرین، فەرماندەی گشتی یەپەژە لە دیمەشقن و لەگەڵ ئەحمەد شەرع کۆدەبنەوە. کۆبوونەوەکە تایبەتە بە میکانیزمی جێبەجێکردنی ڕێککەوتنی ئاداری ئەمساڵ.

لەلایەکی دیکەوە: ئەمڕۆ بەیانی ئاگربەست لە هەردوو گەڕەکە کوردییەکە ڕاگەیێنرا و تەلەڤزیۆنی فەرمی سووریا ڕایگەیاند، هاتووچۆ بۆ هەردوو گەڕەکی ئەشرەفییە و شێخ مەقسوودی حەلەب وەستاوە و تەنیا ڕێگا بە خێزانەکان دەدرێت لەو گەڕەکە بە پیادە بچنە دەرەوە.