باڵیۆزی بەریتانیا بۆ ئاڤا: سەرەڕای ئاستەنگییە ئەمنییەکان دەرفەتی ئاوەدانی و وەبەرهێنان لە عێراقدا هەیە

ئاڤا نیوز

باڵیۆزی بەریتانیا لە عێراق بە ئاڤا میدیای ڕاگەیاند، سەرەڕای ئاستەنگییە ئەمنییەکان بەڵام دەرفەتی ئاوەدانی و وەبەرهێنان لە عێراقدا بوونی هەیە و وڵاتەکەی لەبوارەکانی وزە و پەیوەندییەکان لە ئاوەدانکردنەوەی عێراقدا بەشدار دەبێت.

وێنە گەورەکە: 14ی کانوونی دووەمی ئەمساڵ و لەمیانەی سەردانەکەی محەممەد شیاع سوودانیدا بۆ لەندەن، سەرۆکوەزیرانی عێراق و سەرۆکوەزیرانی بەریتانیا واژۆیان لەسەر 13 گرێبەستی بازرگانی کرد بە بەهای نزیکەی 15 ملیار دۆلار، بڕیاریشیاندا بەغدا و لەندەن لەبوارەکانی وزە، پەیوەندییەکان، کۆچبەران، ژینگە، ئابووری، بەهێزکردنی ڕۆڵی ژنان و دەیان بواری دیکە هاوکاری یەکتریی بکەن.

لێدوانی فەرمی: عیرفان سدیق، باڵیۆزی بەریتانیا لە عێراق، لە بەغدا بەشداریی لە ڕۆژی نیشتیمانی عێراقدا و  بە ئاڤا میدیای ڕاگەیاند، "ئەمڕۆ زۆر گرنگە کە تیایدا یادی ڕۆژی نیشتیمانی عێراق دەکەینەوە چونکە ئەم ساڵانەی دوایی پێشکەوتن و خۆشگوزەرانی لە عێراق بەرەو باشتربوون دەڕوات و ئاسایش و ئارامیش بەرقەرارە ئەوەش زۆر گرنگ و بەبایەخە، نابێت تەنیا چاومان لەسەر ئاستەنگییە ئەمنییەکان بێت بەڵکو دەبێت چاومان لە توانای ئاوەدانی وڵاتەکەش بێت".

وتیشی، لەو چوارچێوەیەدا بوونی کۆمپانیا گەورەکانی جیهان و وەبەرهێنانیان لە عێراق دەبێتە دەرفەتێک بۆ گەشەسەندنی زیاتری وڵاتەکە، لە سەردانەکەی سەرەتای ئەمساڵی سەرۆکوەزیرانی عێراقیش بۆ لەندەن چەندین ڕێککەوتن لەبوارەکانی وزە و پەیوەندییەکان واژۆکران و ئێستا کار بۆ جێبەجێکردنی ڕێککەوتنەکان دەکرێت.

لەبارەی کێشەکانی ناوچەکەش، باڵیۆزی بەریتانیا لە عێراق ئەوەی خستەڕوو،  عێراق بەهۆی هەژموون و کاریگەری لە ناوچەکەدا، دەتوانێت لە ئاستی هەرێمیدا بۆ ئارامی و ئاشتی کاریگەریی هەبێت.