باڵیۆزی فەڵەستین بۆ ئاڤا: پێشوازی لە پلانەکەی ترەمپ بۆ غەززە دەکەین

ئاڤا نیوز

باڵیۆزی فەڵەستین لە عێراق دەڵێت، کاری لەپێشینەی دەوڵەتی فەڵەستین ڕاگرتنی هێرشەکانی سەر غەززە و گەیاندنی هاوکارییە مرۆییەکانە بۆ کەرتەکە، لەم بوارەشدا پێشوازی لە پلانەکەی سەرۆکی ئەمریکا تایبەت بە غەززە دەکەن.

وێنە گەورەکە: 29ی ئەیلوولی ئەمساڵ دۆناڵد ترەمپ، سەرۆکی ئەمریکا پلانی خۆی بۆ ڕاگرتنی شەڕ لە غەززە ڕاگەیاند، بەگوێرەی پلانەکەش دەبێت بارمتەکان ئازاد بکرێن، کەرتی غەززە لەلایەن دەستەیەکی نێودەوڵەتی بەڕێوەببرێت و حەماسیش چەک دابنێت، لای خۆیەوە حەماس بە پلانەکە ڕازییە بەڵام داوای چەکدانان تا کشانەوەی تەواوەتی ئیسرائیل ڕەتدەکاتەوە، دەشیەوێت بەڕێوەبردنی غەززە بە دەستەیەکی سەربەخۆی فەڵەستینی بسپێردرێت نەک دەستەیەکی نێودەوڵەتی.

لێدوانی فەرمی: ئەحمەد روەیزی، باڵیۆزی فەڵەستین لە عێراق، ، لە بەغدا بەشداریی لە ڕۆژی نیشتیمانی عێراقدا و  بە ئاڤا میدیای ڕاگەیاند، "کاری لەپێشینەی فەڵەستین ڕاگرتنی هێرشەکانی سەر گەلەکەمان لە غەززە، گەیاندنی هاوکاری مرۆیی و دانانی بنەمای سیاسییە بۆ دامەزراندنی دەوڵەتی فەڵەستین کە پایتەختەکەی قودس بێت، لەم بوارەشدا لەگەڵ کۆمەڵگەی نێودەوڵەتی کاردەکەین بۆ کشانەوەی ئیسرائیل بۆ سنوورەکانی ساڵی 1967 و داننانی وڵاتانی جیهان بە دەوڵەتی فەڵەستین".

پەیوەست بە پلانەکەی ترەمپیش، وتی، " بۆ ڕزگارکردنی گەلەکەمان پێشوازیی لە پلانەکەی ترەمپ بۆ غەززە دەکەین و دەمانەوێت قۆناغی یەکەم و قۆناغەکانی دیکەی پلانەکە جێبەجێ بکرێن لەوانەش کشانەوەی ئیسرائیل و گەڕانەوەی دەسەڵاتی فەڵەستین بۆ بەڕێوەبردنی غەززە، تا غەززەش هاوشێوەی قودس و کەناری ڕۆژئاوا بەشێک بێت لە نیشتیمانی فەڵەستین".