وەزیرانی کورد لەبارەی مووچە دەچنە لای سوودانی

ئاڤا نیوز

 

بەگوێرەی سەرچاوەیەکی باڵا لە حکومەتی عێراق دوای کۆتاییهاتنی کۆبوونەوەی ئەنجوومەنی وەزیرانی عێراق، بۆ قسەکردن لەبارەی مووچەی خەڵکی کوردستان وەزیرانی کورد لە بەغدا لەگەڵ سوودانی کۆبوونەتەوە.

 

چیرۆکی سەرەکی: نیوەڕۆی ئەمڕۆ سێشەممە ئەنجوومەنی وەزیرانی عێراق بە سەرپەرشتیی محەممەد شیاع سوودانی، سەرۆكوەزیران عێراق كۆبووەوە و نزیکەی دوو کاتژمێر و 40 خوولەکی خایاند. بەپێی زانیارییەكانی ئاڤا، لە كۆبوونەوەكەدا باسی مووچەی فەرمانبەرانی هەرێمی كوردستان نەكرا.

 

زانیاریی تایبەت: سەرچاوەیەکی باڵا لە حکومەتی عێراقەوە بە ئاڤای گوت: دوای کۆتاییهاتنی کۆبوونەوەی ئەنجوومەنی وەزیرانی عێراق بەبێ بڕیاردان لەبارەی مووچە، دوو وەزیری کورد چوونەتە لای سوودانی و ئێستا لەبارەی مووچەی خەڵکی کوردستان لە کۆبوونەوەدان.

 

زانیاریی پەیامنێر: دەروون مەلا ناجی پەیامنێری ئاڤا نیوز لە بەغدا ڕایگەیاند، ئەو سێ وەزیرە کوردەی چوونەتە لای محەممەد شیاع سوودانی، سەرۆکوەزیرانی عێراق بریتین لە: فوئاد حوسێن، وەزیری دەرەوە و خالید شوانی، وەزیری داد  و بەنگین ڕێکانی، وەزیری ئاوەدانکردنەوەی عێراق.

 

لەلایەکی دیکە؛ ڕۆژی دووشەممە ئاڤا بڵاوی كردەوە كە مەسرور بارزانی، سەرۆکوەزیرانی کوردستان لەبارەی مووچە و داهاتی نانەوتی نامەیەکی بۆ محەممەد شیاع سوودانی، سەرۆکوەزیرانی عێراق ناردووە. لە نامەکەدا داوای کردووە بۆچوونی ئەنجوومەنی دەوڵەت لەبارەی دابەشکردنی داهاتی نانەوتی لەنێوان هەولێر و بەغدا بە بنەما وەرنەگیرێت.

 

سەرۆکوەزیرانی کوردستان دووپاتیشی کردووەتەوە ئامادەن هاوشێوەی مانگەکانی ڕابردوو مانگانە 120 ملیار دینار داهاتی نانەوتی بۆ بەغدا بنێرن تاوەکو ڕێککەوتنی کۆتایی لەسەر دەکرێت.