سووریا.. لە 10 مانگ دوای ڕووخانی ئەسەد نزیکەی 11 هەزار کەس کوژراون

ئاڤا نیوز

 

بەگوێرەی ڕاپۆرتێکی ڕوانگەی سووری بۆ مافەکانی مرۆڤ دوای تێپەڕبوونی 10 مانگ بەسەر ڕووخانی ڕژێمی بەشار ئەسەد، 10 هەزار و 955 کەس کوژراون.

 

وێنە گەورەکە: دوای پێنج دەیە لە حوکمڕانیی بنەماڵەی ئەسەد، ڕۆژی 8ـی تشرینی دووەمی ساڵی 2024 ئۆپۆزیسیۆنی سووریا کۆتایهاتنی دەسەڵاتی ئەسەدی بە تەواوی ڕایگەیاند. دوای تێپەڕبوونی 10 مانگ بەسەر ڕووخانی ڕژێمی بەشار ئەسەد، سووریا نەک هەر ئارامی بەخۆیەوە نەبینی، بەڵکو گێژاوێکی نوێی تووندوتیژی و پێشێلکارییەکان، ژیانی هاووڵاتییانی پەکخستووە.

 

بڵاوکراوەی فەرمی: بەگوێرەی ڕاپۆرتێکی ڕوانگەی سووری بۆ مافەکانی مرۆڤ. لەو ماوەیەدا (8ـی کانوونی یەکەمی 2024 تا 8ـی تشرینی یەکەمی 2025)، 10 هەزار 955 کەس کوژراون، کە هەشت هەزار و 422یان هاووڵاتی سڤیل بوونە، لەنێویاندا 463 منداڵ و 636 ژن. ئەمەش نیشانەی قووڵبوونەوەی ئاڵۆزی و گەشەسەندنی پێشێلکارییەکانی مافی مرۆڤە لەلایەن لایەنە ناوخۆیی و دەرەکییەکانەوە.

 

زانیاریی زیاتر: هەر بەگوێرەی ڕاپۆرتەکەی ڕوانگەی سووری، لەو ماوەیەدا حاڵەتەکانی کوشتن لە دەرەوەی یاسا، گوللـەباران کردن، ڕفاندن، ئەشکەنجەدان، هێرشی هەڕەمەکی بۆ سەر هاووڵاتیان و بۆمبڕێژکردنی بەردەوام لە ناوچە جیاوازەکاندا تۆمار کراون.

 

لەلایەکی دیکەوە: ڕوانگەکە ئاماژە بۆ ئەوە دەکات، هەزاران کەس بێسەروشوێنن و چارەنووسیان نادیارە، زیندانەکان پڕن لە دەستگیرکراوان، زۆربەیان بەبێ دادگاییکردن و بە تۆمەتی ناڕوون دەستبەسەر کراون.

 

داواکاری فەرمی: ڕوانگەی سووری بۆ مافەکانی مرۆڤ داوا لە کۆمەڵگای نێودەوڵەتی دەکات، لێژنەی لێکۆڵینەوە بنێرن بۆ زیندانەکانی سووریا، تا چارەنووسی دەستگیرکراوان یەکلایی بێتەوە و کۆتایی بە پێشێلکارییەکان بهێنرێت.