ئەردۆغان: ترەمپ داوای لێکردم حەماس بە ڕێککەوتن ڕازی بکەم

ئاڤا نیوز

 

ڕەجەب تەیب ئەردۆغان، سەرۆککۆماری تورکیا دەڵێت، دۆناڵد ترەمپ، سەرۆکی ئەمریکا داوای لێکردووە حەماس ڕازی بکات بێتە سەر مێزی گفتوگۆ و بە دانوستان ڕازی بێت.

چیرۆکی سەرەکی: ئەمڕۆ چوارشەممە شاندێکی حەماس لەگەڵ شاندێکی ئیسرائیل لە شەرم شێخ لە میسر بەسەرپەرشتی و چاودێریی ئەمریکا بۆ کۆتاییهێنان بە جەنگی غەززە کۆبوونەوە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند؛ "دۆناڵد ترەمپ، سەرۆکی ئەمریکا داوای لێکردم لەگەڵ حەماس قسە بکەم و ڕازیان بکەم بەوەی دانوستان بکەن و ڕێکبکەون."

 

سەرۆککۆماری تورکیا جەختی لەوەکردووە کە "ئێمە دەستمان لە گەڕانەوەی ئاشتی هەیە بۆ فەڵەستین و وەک هەمیشە لە خەمی براکانمانین".

 

لەلایەکی دیکەوە: ماڵپەڕی تایمز ئۆڤ ئیسرائیل لەزاری ئۆفیسی ئەردۆغانەوە ئەوەی دووپاتکردووەتەوە کە تورکیا بەردەوام لەسەر هێڵ بووە بۆ کۆتایی هێنان بەو جەنگە و ئەو شاندەی حەماس کە ئێستا لە شەرم شێخن تورکیا لە پەیوەندیی بەردەوامدایە لەگەڵیان.

 

زانیاریی زیاتر: لەسەر بنەمای پلانەکەی ترەمپ، ئیسرائیل بەتەواوی لە غەززە دەکشێتەوە و لەبەرامبەردا حەماسیش سەرجەم بارمتە ئیسرائیلییەکان ئازاد دەکات، ئەوانەشی مردوون تەرمەکانیان ڕادەست دەکاتەوە.