ئاڤای خەڵک؛ دانیشتووانی گەڕەکی شێخان لە سەیدسادق داوای قیرتاوکردنی ڕێگایەکی سەرەکی دەکەن

ئاڤا نیوز

دانیشتووانی گەڕەکی شێخان لە قەزای سەیدسادق، داوای قیرتاوکردنی ڕێگایەکی سەرەکیی ناو شارەکەیان دەکەن، کە بە "ڕێگای گۆڕستانی سەیدسادق بۆ گەڕەکی شێخان" ناسراوە.

ئەم ڕێگایە، درێژییەکەی نزیکەی سێ کیلۆمەتر دەبێت، چەندین شوێنی گرنگی لەسەرە، وەک بەندیخانەی گەورەی سەیدسادق، گۆڕستانی گشتیی شارەکە و ناوچەی پیشەسازی، ئەمەش وایکردووە کە جموجۆڵێکی زۆری لەسەر بێت.

زانیاریی بەدەستهاتوو: ئەسعەد محەممەد، یەکێک لە دانیشتووانی گەڕەکی شێخان، بە ئاڤای وت، "لە وەرزی هاویندا بەهۆی تۆز و خۆڵبارین و لە وەرزی زستانیشدا بەهۆی قوڕ و چڵپاوەوە، گیرمان خواردووە. ئاماژەی بەوەشدا کە دۆخی خراپی ڕێگاکە کاریگەریی نەرێنی لەسەر ژیانی ڕۆژانەیان دروست کردووە. 

 

لێدوانی فەرمی: زمناکۆ ئەنوەر، سەرۆکی شارەوانی سەیدسادق، لەبارەی داواکارییەکە و ڕێکارەکان بۆ چارەسەرکردنی، بە ئاڤای ڕایگەیاند: "وەزارەتی ئاوەدانکردنەوە کەشفیان بۆ شوێنەکە کردووە و دەرخستەیان بۆ ئامادەکردووە. پڕۆژەکە بە بڕی 400 ملیۆن دینار خراوەتە تەندەرینەوە و چاوەڕێ دەکەین لە نزیکترین کاتدا کۆمپانیای جێبەجێکار دەستبەکار بێت."