ئاڤای خەڵک؛ شۆفێران داوای چاککردنی ڕێگای سەرەکی نێوان ڕانیە - چوارقوڕنە دەکەن

ئاڤا نیوز

شۆفێران نیگەرانن لە خراپی ڕێگای سەرەکی نێوان ڕانیە و چوارقوڕنە داوای نۆژەنکردنەوەی دەکەن، بەڕێوەبەری چاککردنەوە و ڕێگاوبانی ڕاپەڕین دەڵێت، نزیکەی لە 10%ـی ڕێگاکەمان نۆژەنکردووەتەوە.

زانیاریی بەدەستهاتوو: جێگر محەممەد، شۆفێری بارهەڵگرە و ڕۆژانە لەم ڕێگایەدا هاتووچۆ دەکات، باس لە مەترسی و زیانەکانی دۆخی ئێستای ڕێگاکە دەکات و دەڵێت، "ڕێگاکە زۆر خراپە، بەرز و نزمی و چاڵ و چۆڵی زۆری تێدایە، ئۆتۆمبێلەکانمان هەمووی لێک هەڵوەشاوەتەوە. جگە لەوەی زۆر مەترسیدارە و هەفتە نییە چەند ڕووداوێکی هاتووچۆ لەم ڕێگایە ڕوو نەدات."

لێدوانی فەرمی: ئومێد حەمە ئەحمەد، بەڕێوەبەری چاککردنەوە و ڕێگاوبانی ڕاپەڕین، بە ئاڤای ڕاگەیاند، "درێژی ئەم ڕێگایە نزیکەی 10 کیلۆمەترە. نزیکەی لە 10%ـی ڕێگاکەمان نۆژەنکردووەتەوە و بەپێی بودجەی بەردەستیش، ناو بەناو بەشێکی دیکەی نۆژەن دەکەینەوە."

زانیاریی زیاتر: بەڕێوەبەری ڕێگاوبانی ڕاپەڕین ئاشکرایشی کرد: "ئێستاش کار لەسەر ئەوە دەکەین دەرخستە ئامادە بکەین و داواکارییەک بەرز بکەینەوە بۆ ئەوەی ڕەزامەندی سەرووی خۆمان وەربگرین و ڕێگاکە بکەین بە دوو ساید."