میدیاکانی ئیسرائیل: ڕێککەوتنی غەززە واژۆ دەکرێت و ترەمپ دەچێتە میسر

ئاڤا نیوز

میدیاکانی ئیسرائیل ئاماژە بە بەرەوپێشچوونی بەرچاو لە دانوستانەکانی شەرەم شێخ بۆ ئاگربەستی غەززە دەکەن و بڵاویان کردووەتەوە، ڕێککەوتنەکە واژۆ دەکرێت و ترەمپ دەچێتە میسر.

زانیاریی بەدەستهاتوو: کەناڵی 12ـی ئیسرائیلی ڕایگەیاند ڕۆژی هەینی 10-10-2025 دۆناڵد ترەمپ، سەرۆکی ئەمریکا هاوکات لەگەڵ ڕاگەیاندنی ڕێککەوتنی ئاگربەست دەگاتە میسر.

زانیاریی زیاتر: بە گوێرەی زانیارییەکان ڕەشنووسی ڕێککەوتنی ئازادکردنی بارمتەکان و وەستانی جەنگ ئامادە کراوە.

لەلایەکی دیکەوە: پێشتر ڕۆژنامەی یەدیعوت ئەحرەنوتی ئیسرائیلی ڕایگەیاندبوو کە لە تەلئەبیبی پایتەختی ئیسرائیل ئامادەکاری بۆ ئەگەری سەردانی ترەمپ بۆ ئەو وڵاتە دەکرێت.

ئەوەی پێویستە بیزانیت: پێشتر عەبدولفەتاح سیسی، سەرۆکی میسر ڕایگەیاندبوو لە ئەگەری ڕێککەوتنی غەززە، ترەمپ بۆ شەرەم شێخ بانگهێشت دەکات تا لە ڕێوڕەسمی واژوکردنەکەدا ئامادە بێت.

ئەوەی لە بارەیەوە دەگوترێت: ترەمپ ڕێککەوتنی غەززە بە دەستکەوتێکی گەورەی خۆی دەزانێت و دەیەوێت لە ڕێوڕەسمەکە ئامادە بێت.