لە ماوەی مانگێکدا 23 بەنزینخانە لە هەولێر سزا دراون

ئاڤا نیوز

بەهۆی فرۆشتنی بەنزینی کوالێتی خراپ بە شوفێران، تیمەکانی بەڕێوەبەرایەتیی نەوت و کانزاکانی هەولێر، 23 بەنزینخانەیان داخست و نزیکەی 33 ملیۆن دینار سزای دارایی دراون.

وێنە گەورەکە: تیمەکانی بەڕێوەبەرایەتیی نەوت و کانزاکانی هەولێر، ڕۆژانە سەردانی سەرووی 40 بەنزینخانە دەکەن و نموونەی بەنزینەکەیان دەبرێتە تاقیگە، ئەگەر ئۆکتانی بەنزینەکە لە نمرەی ستاندارد نەبێت و هەر سەرپێچییەکی دیکە لە بەنزیخانەکە ببینرێت سزای دارایی دەدرێت و دادەخرێت، چەند سەرپێچییەکەی گەورەبێت سزاکە قورستر دەبێت.

لێدوانی فەرمی: سالار محەممەد، لێپڕسراوی بەشی پشکنین لە بەڕێوەبەرایەتی نەوت و کانزاکانی هەولێر؛ بە ئاڤای گوت، "لە ماوەی مانگی نۆدا تیمەکانمان پشکنین و بەدواداچوونیان بۆ سەدان بەنزیخانەی هەولێر کردووە، 23 بەنزینخانە سزادراون، بە داخستن کە ماوەکەیان بەگوێرەی سەرپێچی لەپێنج ڕۆژ بۆ یەک مانگ بووە، لەگەڵ سزای پێبژاردن کە تێکڕا نزیکەی 33 ملیۆن دینار بووە."

ئەمەش بزانە: لە سەنتەری شاری هەولێر و دەوروبەری 260 بەنزینخانە هەن، هەر بەنزیخانەیەک بەنزینەکەی لە پشکنین دەرنەچێت لەلایەن تیمەکانی بەڕێوەبەرایەتیی نەوت و کانزاکانی هەولێر دادەخرێت، 250 هەزار بۆ سێ ملیۆن دینار سزا دەدرێت.