وڵاتان پێشوازی لە ڕێککەوتنی حەماس و ئیسرائیل بۆ غەززە دەکەن

ئاڤا نیوز

دواجار بە هەوڵەکانی دۆناڵد ترەمپ، سەرۆکی ئەمریکا، هەریەکە لە بزووتنەوەی حەماس و ئیسرائیل قۆناغی یەکەمی پلانی ئاشتی غەززەیان واژۆ کرد، لەژێر ڕۆشنایی ئەم پێشهاتە وڵاتان پێشوازی لەم هەنگاوە دیپلۆماسییە دەکەن داوا دەکەن بنەماکانی ڕێککەوتنەکە جێبەجێی بکرێت.

چیرۆکی سەرەکی: دوای ڕاگەیاندنی پلانی ئاشتی غەززە لەلایەن دۆناڵد ترەمپ، سەرۆکی ئەمریکا، ئیسرائیل و حەماس بە خاڵەکانی نێو پلانەکە ڕازی بوون و بەرەبەیانی ئەمڕۆ پێنجشەممە، ئاشتی لە گەززە ڕاگەیێنرا.

کاردانەوەکان: دوای ڕاگەیاندنی ڕێککەوتنەکە، وڵاتان و کەسایەتییە سیاسییەکان پێشوازییان لە ڕێککەوتنەکە کرد و داوا دەکەن بنەماکانی ڕێککەوتنەکە جێبەجێی بکرێت.

٠ کەیر ستارمەر، سەرۆکوەزیرانی بەریتانیا ڕایگەیاند، پێشوازی لە ڕێککەوتنی حەماس و ئیسرائیل دەکەم بۆ قۆناغی یەکەمی پلانی ترەمپ بۆ ئاشتی و دەبێت ئەم ڕێککەوتنە بەبێ دواکەوتن بە تەواوی جێبەجێ بکرێت

٠ ئەنتۆنی ئەلبانیز، سەرۆکوەزیرانی ئوسترالیا، پێشوازی لە ڕێککەوتنەکە کرد و داوای لە هەموو لایەنەکان کرد ڕێز لەبنەماکانی ڕێککەوتنەکە بگرن.

٠ مارک کارنی، سەرۆکوەزیرانی کەنەدا داوا دەکات هەموو لایەنەکان بەخێرایی کاربکەن مەرجەکانی ڕێککەوتنەکان جێبەجێ بکەن و کار بۆ ئاشتییەکی دادپەروەر و بەردەوام بکەن.

٠ ئه‌نتۆنیۆ گۆتیرێس، سكرتێری گشتی نه‌ته‌وه‌یه‌كگرتووه‌كان داوا دەکات سەرجەم بارمتەکان بە شێوەیەکی شکۆمەندانە ئازاد بکرێن و ئاگربەستی هەمیشەیی مسۆگەر بکرێت و شەڕەکە بە تەواوی بوەستێت.

٠ ئیسبن بارس، وەزیری دەرەوەی نەرویج دەڵێت، پێویستە تەواوی لایەنەکان پێشوازی لەم ڕێککەوتنە بکەن، هاوکات بە ئومێد و وریاییەوە چاودێریی و  مامەڵە لەگەڵ ڕێککەوتنەکەدا دەکەین.

٠ ئەنتیۆ تایانی، وەزیری دەرەوەی ئیتاڵیا پیشتوانی خۆی بۆ ئاگربەست دووپاتدەکاتەوە و دەڵێت، هەواڵی خۆش لە ڕۆژهەڵاتی ناوەڕاستەوە دێت و ئێمە ئامادەین یارمەتیدەر بین بۆ دەستەبەرکردنی سەقامگیریی لەناوچەکە.