تورکیا لە نزیکەوە چاودێری جێبەجێکردنی ڕێککەوتنامەی غەززە دەکات

ئاڤا نیوز

سەرۆککۆماری تورکیا لەبارەی ڕێککەوتنی غەززە خۆشحاڵی خۆی دەردەبڕێت و دووپاتیدەکاتەوە، لە نزیکەوە چاودێری جێبەجێکردنی ڕێککەوتنەکە دەکات.

وێنە گەورەکە: دوای دووساڵ لە جەنگ، دواجار بەرەبەیانی ئەمڕۆ پێنجشەممە دۆناڵد ترەمپ، سەرۆکی ئەمریکا ڕێککەوتنی کۆتاییهێنانی جەنگی نێوان ئیسرائیل و حەماس لە غەززە ڕاگەیاند. وڵاتانی جیهان پێشوازی لە ڕێککەوتنەکە دەکەن و داواکارن بە زوویی جێبەجێ بکرێت.

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند، خۆشحاڵین کە دانوستانەکانی نێوان حەماس و ئیسرائیل بە هاوکاری تورکیا بووەتە هۆی بەدیهاتنی ئاگربەست لە غەززە، هاوکات تورکیا لە نزیکەوە چاودێری جێبەجێکردنی ڕێککەوتنەکە دەکات و بەردەوامیش دەبێت لە بەشداریکردن لە پرۆسەکەدا.

لەلایەکی دیکەوە: وەزارەتی دەرەوەی تورکیا لەسەر هەمان پرس ڕایگەیاند، هیوادارین دانوستانەکانی دواتر ببێتە هۆی چارەسەری دوو دەوڵەتی، هاوکات جەخت لە ڕۆڵی تورکیا وڵاتەکەی لە جێبەجێکردنی قۆناغەکانی ڕێککەوتنی ئاگربەست و پێشکەشکردنی پیشتوانی تەواو دەکاتەوە.