هەرێمی کوردستان لەبارەی مووچە و هەڵبژاردن پەیامێکی تووند بۆ سوودانی دەنێرێت

ئاڤا نیوز

 

سەرۆکی ڕەوتی حیکمەی نیشتمانی، پەیامێکی توندی سەرکردایەتیی کوردستانی گەیاندووەتە سوودانی سەبارەت بە هەڵوێستی ناوبراو لەبارەی پرسی مووچەی خەڵکی کوردستان و تێیدا هاتووە، "دوای هەڵبژاردن هەرێمی کوردستان، حیساباتی خۆی دەکات و ئەم مامەڵەیەی ئێستا سوودانی هەرگیز لەبیر ناچێتەوە."

 

چیرۆکی سەرەکی: لەم چەند ڕۆژەی ڕابردوودا، عەمار حەکیم سەردانی هەولێری کرد و لەگەڵ هەریەک لە سەرۆک مەسعود بارزانی، نێچیرڤان بارزانی، سەرۆکی هەرێمی کوردستان و سەرۆکوەزیران مەسروور بارزانی، کۆبووەوە.

 

زانیاریی تایبەت؛ بەپێی زانیارییەکانی ئاڤا، لە کۆبوونەوەکانیاندا لەگەڵ عەمار حەکیم، سەرکردایەتیی هەرێمی کوردستان گلەیی توندیان لە شێوازی مامەڵەی محەممەد شیاع سوودانی هەبووە، بەتایبەت لە پرسی نەناردنی مووچەی فەرمانبەرانی هەرێمدا.

 

ناوەڕۆکی پەیام؛ ناوەڕۆکی پەیامەکە ئەوە بووە کە سەرەڕای پشتیوانیی بەهێزی هەرێمی کوردستان بۆ پێکهێنانی حکوومەتەکەی سوودانی، بەڵام سەرۆکوەزیرانی عێراق لە ئاست چاوەڕوانییەکاندا نەبووە و مامەڵەیەکی نەرێنی لەگەڵ هەرێمدا کردووە.

 

عەمار حەکیم دوای گەڕانەوەی لە هەرێمی کوردستان لەگەڵ محەممەد شیاع سوودانی، سەرۆکوەزیرانی عێراق سوودانی کۆبووەتەوە و بە سوودانی ڕاگەیاندووە: "سەرکردایەتیی هەرێمی کوردستان زۆر لێت تووڕەن، ئەوان پشتیوانییەکی زۆریان کردی، بەڵام تۆ لەگەڵیاندا باش نەبوویت."

 

هەروەها لە پەیامەکەدا جەخت لەوە کراوەتەوە کە دروستکردنی کێشە بۆ ناردنی مووچە و بەتایبەتیش نەناردنی مووچە پێش جەژن، هیچ سەرۆکوەزیرانێکی پێشووتری عێراق کاری لەو شێوەیەی نەکردووە، "هەرگیز لەبیر ناکرێت."

 

هەنگاوی داهاتوو؛ پەیامەکە ئاماژەی بە هەڵوێستی داهاتووی سەرکردایەتیی هەرێمی کوردستان کردووە و تیایدا هاتووە کە "دوای هەڵبژاردن، حیساباتی خۆی دەکات و ئەم مامەڵەیەی ئێستا هەرگیز لەبیر ناچێتەوە." ئەمەش وەک ئاماژەیەک بۆ ئەوەی کە چیتر بە ئاسانی و بەبێ مەرجی ڕوون، پشتیوانی لە کاندیدی هیچ لایەنێک بۆ پۆستی سەرۆکوەزیرانی داهاتووی عێراق ناکات.

 

ئەمەش بزانە: دوای گەڕانەوەی لە هەولێر، نووسینگەی عەمار حەکیم پشتڕاستی کردەوە کە ناوبراو لەگەڵ محەممەد شیاع سوودانی کۆبووەتەوە و یەکێک لە تەوەرە سەرەکییەکانی گفتوگۆکانیان، تاوتوێکردنی پەیوەندییەکانی نێوان حکوومەتی فیدراڵی و حکوومەتی هەرێمی کوردستان بووە.