زانکۆی سلێمانی و دوو زانکۆی تر لەسەر ئاستی عێراق یەکەم دەبن

ئاڤا نیوز

بۆ ساڵی دووەمی لەسەریەک، زانکۆی سلێمانی پلەی یەکەمی لەسەر ئاستی زانکۆکانی عێراق بەدەستهێنا، لە ڕیزبەندی زانكۆكانی جیهانیش، لە كۆی دووهەزار و 191 زانكۆ، لە پلەی هەزار بۆ هەزار و 200ـە.

چیرۆكی سەرەكی: دامەزراوەی تایمز لە بەریتانیا، ساڵانە ڕیزبەندی زانكۆكانی جیهان بڵاودەكاتەوە، بەپشتبەستن بە چەندین پێوەری قوورس بۆ ئەوەی زانكۆكە بتوانێت ڕاكینگی بەشداریكردن بەدەستبهێنێت و پێوەرەكان تێبپەڕێنێت، ئەمساڵ زیاتر لە سێ هەزار زانكۆ لە جیهان، داوایانكردووە بەشداربن، بەڵام تەنیا دووهەزار و 191 زانكۆ، مەرجەكانی بەشداریكردن لە پێشبڕكێكەیان هەبووە.

چی ڕوویدا: لە عێراق، 91 زانكۆ داواكاری بەشداریكردنیان لەو پێشبڕكێیە پێشكەشكرد، تەنیا 25 زانكۆ ڕەزامەندییان بەدەستهێنا و توانییان بەشداربن، لە كۆی زانكۆ قبووڵكراوەكانی عێراقیش، زانكۆی سلێمانی پلەی یەكەمی بەدەستهێنا.

لێدوانی فەرمی: پڕۆفیسۆر د.کۆسار محەممەد، سەرۆکی زانکۆی سلێمانی، لە كۆنفرانسێكی ڕۆژنامەوانیدا ڕایگەیاند، زانكۆی سلێمانی ساڵی پاریش لە پلەی یەكەمی ڕیزبەندییەكە هات و ئەمساڵیش توانی پارێزگاری لە پێگەكەی بكات.

وتیشی، لە سەرانسەری عێراق، تەنیا 25 زانکۆ، مەرجەکانی شیاوبوونیان تێدایە، ڕیزبەندییان بۆ کراوە، لەو ژمارەیە زانکۆی سلێمانی یەکەم بووە، لە ڕێزبەندی زانكۆكانی جیهانیش لە کۆی دوو هەزار و 191  زانكۆ لە پلەی هەزار بۆ  هەزار و 200ـە.

پەیوەست بەم بابەتە: سەرۆکی زانکۆی سلێمانی داوا لە حکومەتی هەرێمی كوردستان دەكات، بۆ بەرەوپێشچوونی زیاتری زانكۆكە هاوكاریان بن و پێداویستیە کارگێڕی و زانستی و ماددییەکانی زانکۆکە دابین بکەن.