هێزە ئەمنییەكانی ئێران بڵاوکردنەوەی هەواڵی کوژرانی کۆڵبەرەکان قەدەغە دەکەن

ئاڤا نیوز

 

هێزە ئەمنییەكانی ئێران هۆشداریی دەدەنە چالاكوان و میدیاكارانی شاری بانەی ڕۆژهەڵاتی كوردستان لەمەودوا هەواڵی كوژرانی كۆڵبەرەكان بڵاو نەكەنەوە، ئەمەش بۆ ڕێگری لە ئەگەری دروستبوونی ناڕەزایی.

زانیاریی تایبەت؛ بەپێی ئەو زانیارییانەی دەست ئاڤا میدیا كەوتوون، ڕۆژی پێنجشەممەی ڕابردوو پۆلیسی سایبەریی ئێران بە ئامادەبوونی نوێنەری وەزارەتی ئیتلاعات لەگەڵ ژمارەیەك لە بەڕێوەبەری ماڵپەر و دەزگای ڕاگەیاندن لە شاری بانە كۆبووەتەوە و ئاگاداری كردوونەتەوە كە نابێت هەواڵی كوژران و پرسە و سەرەخۆشی تاوەكوو سێ كاتژمێر لەدوای ناشتنی تەرمی كۆڵبەرەكان بڵاو بكرێتەوە، پاشان ئەگەر هەواڵەكە بڵاویش كرایەوە نابێت ئاماژە بە ئەوە بكرێت كە ئەو كەسە كۆڵبەر بووە و بەهۆی كۆڵبەرییەوە كوژراوە.

 

ئەوەی پێویستە بیزانیت؛ بەپێی ئەو داتایانەی كە لە سەرچاوەی باوەڕپێكراوەوە دەست ئاڤا كەوتوون لە ماوەی یەک مانگی ڕابردوودا 6 کۆڵبەر لە ناوچە سنوورییەکانی شاری بانە کوژراون و ئەمەش لەنێو خەڵکدا بووەتە هۆی ناڕەزایەتی، بۆیە لایەنە ئەمنییەکان نیگەرانن لەوەی كە ناڕەزایی خەڵك زیاتر پەرە بسێنێت.

ئەمە لە كاتێكدا كە پێشتریش لە شاری سەردەشت بەڕێوەبەرانی کەناڵ و پەیجەکانی هەواڵ هۆشداریان پێدرابوو کە نابێت هەواڵی کوژرانی کۆڵبەرەکان بڵاو بکەنەوە.

 

باکگراوند؛ بەپێی ڕاپۆرتی ڕێكخراوە تایبەتمەندەكان لە 6 مانگی ڕابردوودا لە 17 کۆڵبەر لە سنووری ڕۆژهەڵاتی كوردستان گیانیان لەدەستداوە و 20 کەسی دیکەش بریندار بوون. ئەو کۆڵبەرانە لە ناوچە سنوورییەکان پارێزگاکانی ورمێ، کرماشان و سنە بەهۆکاری جیاوازی وەک دەستڕێژی گوللە، سەرما، تەقینەوەی مین و کەوتنەوەخوارەوە لە شاخ  و بریندار یان گیانیان لەدەستداوە.