هیندستان دوای پێنج ساڵ باڵیۆزخانەکەی لە ئەفغانستان دەکاتەوە

ئاڤا نیوز

ئەفغانستان و هیندستان پەیوەندییە دیپلۆماسییەکانیان بۆ ئاستی باڵیۆزخانە بەرز دەکەنەوە، بۆ ئەو مەبەستەش دوای پێنج ساڵ لە داخرانی نیودەلهی باڵیۆزخانەی خۆی لە کابوول دەکاتەوە.

 

چیرۆکی سەرەکی: لەمیانی سەردانی ئەمیر خان موتەقی، وەزیری دەرەوەی ئەفغانستان بۆ نیودەلهیی پایتەختی هیندستان و کۆبوونەوەی لەگەڵ سوبرامانیام جایشانکار، وەزیری دەرەوەی هیندستان، وەزارەتی دەرەوەی هیندستان ڕایگەیاند کە ئەرکی خۆی لە کابوول لە ئاستی تەکنیکییەوە بۆ باڵیۆزخانە بەرز دەکاتەوە. 

 

لەلایەکی دیکە؛ ئەفغانستان ڕایگەیاندووە کە دیپلۆماتکارەکانی ڕەوانەی هیندستان دەکات.

 

ئەمەش بزانە: دوای گەڕانەوەی تاڵیبان بۆ حوکمی ئەفغانستان لە ئابی 2021، هیندستان باڵیۆزخانە و کونسوڵخانەکانی لە ئەفغانستان داخست. بەڵام دواتر لە ساڵی 2022 تیمێکی تەکنیکی نارد بۆ کابوول.

 

ئەوەی پێویستە بیزانیت: نیودەلهی ئەم هەنگاوە دیپلۆماسییە لە کاتێکدا ڕادەگەیەنێت کە هێشتا ئیدارەی تاڵیبانی وەک حکومەتی ئەفغانستان نەناساندووە. تا ئێستا تەنیا ڕووسیا دانی بە حکومەتی تاڵیباندا ناوە.