ئەمشەو هەڵبژاردەی عێراق لەبەردەم هەلێکی مێژوویدایە

ئاڤا نیوز

ئەمشەو عێراق یەکێک لە چارەنووسازترین یارییەکانی دەکات، لە پاشکۆی پاڵاوتنی ئاسیا بۆ گەیشتن بە مۆندیالی 2026 ڕووبەڕووی ئیندۆنیزیا دەبێتەوە، شەش یاریزانی کورد لەنێو ڕیزی بانگێشتکراوەکانن، ئامانجیانە دوای 40 ساڵ جارێکی دیکە عێراق بگەیێنن بە مۆندیال.

چیرۆکی سەرەکی: کاتژمێر 10:30 خولەک بە کاتی هەولێر لە جەددەی پایتەختی سعودییە، عێراق بۆ بڕینی نیوەی ڕێگا بەرەو مۆندیالی 2026 و ئیندۆنیزیاش بۆ قەرەبووی کردنەوەی شکستی یاریی یەکەم و زیندوو هێشتنەوەی خەونی گەیشتن بەو پاڵەوانیەتی مۆندیال بەیەک دەگەن.

زانیاریی زیاتر: یاریی یەکەم سعودییە بە ئەنجامی سێ گۆڵ بەرامبەر بە دوو گۆڵ لە ئیندۆنیزیا بردەوە، ئەم یارییە جگە لە بردنەوە بەهەموو ئەگەرێکی دیکە ئەرکی شێرەکانی ڕافیدەین قوورس دەکات، عێراق دەبێت ئەمشەو بە جیاوازی دوو گۆڵ لە ئیندۆنوزیا بباتەوە، یاریی داهاتووش کە 14ـی ئەم مانگە دەکرێت، لەگەڵ سعودییە بباتەوە یان یەکسان بێت، ئینجا دێتە پلەی یەکەم و سەردەکەوێت.

ئەمەش بزانە: لە نێو لیستی یاریزاناندا شەش یاریزانی کورد هەن، کە هەر یەک لە ئاکام هاشم، شێرکۆ کەریم، یوسف ئەمین، مارکۆ فەرەج، مێرخاس دۆسکی و ئوسامە ڕەشید لەخۆدەگرێت، بە ئەگەری زۆرەوە بەشێکی زۆریان لە پێکهاتەی سەرەکی دەبن.

لەلایەکی دیکەوە: شەش هەڵبژاردەی ئاسیا کە پاشکۆی پاڵاوتن دەکەن بەسەر دوو کۆمەڵەی سێ هەڵبژاردەیی دابەشکراون، یەکەمی هەردوو کۆمەڵەکە ڕاستەوخۆ سەردەکەون بۆ مۆندیال، دووەمی هەردوو کۆمەڵە یارییەکی یەکلایکەرەوە دەکەن، براوەیان بەرامبەر پاشکۆی کیشوەرێکی دیکە یاریی دەکات.