ئەمساڵ 27 کۆڵبەر بە تەقەی ڕاستەوخۆی پاسەوانی سنووریی ئێران کوژراون

ئاڤا نیوز

ڕێکخراوی مافی مرۆڤی هەنگاو ئاماری ئەمساڵی کوژرانی کۆڵبەران ئاشکرا دەکات و ئەوەش ڕادەگەیێنێت کە هێزە ئەمنییەکانی ئێران هۆشداریی تووندیش بە ڕۆژنامەنووسان دەدەن. 

وێنە گەورەکە: لەو دۆخە سەختە ئابوورییەی چەندین ساڵە بەرۆکی ئێرانی گرتووە و تا دێت ئابوورییەکەی دادەکەوێت، هەزاران کەس لە ڕۆژهەڵاتی کوردستان بۆ پەیداکردنی بژێوی ژیانیان ڕێگای سەخت و پڕ هەورازی کۆڵبەری لە زستانی سارد و بەفراوی و هاوینی تاقەتپڕوکێندا دەگرنەبەر. ئەم کارە پڕە لە مەترسی و لە سەرووی هەموویانەوە تەقەی هێزە ئەمنییەکانی سەر سنوورە.

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند: ئەمساڵ 27 کۆڵبەر بە تەقەی ڕاستەوخۆ پاسەوانی سنووریی ئێران کوژراون، 21ـی دیکەش بریندار بوون. بەشێکی دیکەی کۆڵبەران مینیان پێدا تەقیوەتەوە و بەهۆیەوە کەمئەندامبوون، یان تووشی ڕەنووی بەفر و بەربوونەوە بوون، یانیش ڕەقبوونەتەوە.

ئەوەی پێویستە بیزانیت: بە گوتەی نەشمیل عابدی، بەردەوام هێزە ئەمنیییەکانی ئێران گوشار دەخەنە سەر ڕۆژنامەنووسان و بەڕێوەبەرانی چەناڵەکانی تیلیگرامی ڕێکخراوەکان، تاوەکو ئامارەکانی کۆشتنی کۆڵبەران بڵاونەکەنەوە و هیچ زانیارییەکیان لەبارەوە ئاشکرا نەکەن. 

زانیاریی بەدەستهاتوو: ئاڤا میدیا زانیویەتی پۆلیسی سایبیری ئێران بە ئامادەبوونی نوێنەری وەزارەتی ئیتلاعاتی وڵاتەکە، لەگەڵ ژمارەیەك لە بەڕێوەبەری ماڵپەر و دەزگاکانی ڕاگەیاندن لە شاری بانە كۆبووەنەتەوە و هۆشدارییان پێداون، لەوەی نابێت هەواڵی کۆڵبەران تا سێ كاتژمێر لەدوای ناشتنی تەرمەکانیان بڵاو بكرێتەوە و ئاماژە بکرێت بەوەی کۆڵبەر بووە و لەکاتی کۆڵبەریدا کوژراوە.