هۆشیار زێباری: پێویستە عێراق لەڕێگەی دامەزراوە فەرمییەکانەوە لە ئاستی نێودەوڵەتیی مامەڵە بکات

ئاڤا نیوز

وەزیری پێشووتری دەرەوەی عێراق دەڵێت، حکومەت و سەرۆکوەزیرانی فیدڕاڵ خاوەن قوڵاییەکی نێودەوڵەتیی و دیپلۆماسی نین، کێشەی زمان و پەیوەندی دیپلۆماسیشیان وەک دوو ئاستەنگیی دەبینێت، داواش دەکات عێراق لەڕێگەی دامەزراوە فەرمییەکانەوە لە ئاستی نێودەوڵەتیدا مامەڵە بکات.

وێنە گەورەکە: لە ڕۆژی پێنجشەممەی ڕابردووەوە کە ئەمریکا سزای بەسەر کۆمپانیاکی سەر بە حەشدی شەعبی و چەند دامەزراوەیەکی دیکەدا سەپاند، پرسیارەکان لەسەر توانای حکومەت بۆ کۆنتڕۆڵکردنی گرووپە چەکدارەکان و دوورخستنەوەی وڵات لە کێشەی هەرێمیی و سزای ئەمریکی و نێودەوڵەتی زیاتر بوون.

ڕاگەیێنراوی فەرمی: هۆشیار زێباری، ئەندامی دەستەی کارگێڕی مەکتەبی سیاسیی پارتی و وەزیری پێشووتری دەرەوەی عێراق لە هەژماری خۆی لە تۆڕی ئێکس نووسیویەتی، کێشەی حکومەتی عێراق و سەرۆکوەزیرانی فیدڕاڵ ئەوەیە لە مامەڵەکردندا خاوەن قوڵاییەکی نێودەوڵەتیی و دیپلۆماسی نین و گیرۆدەی ڕابردوویەکی شکسخواردوون، زمان یەکێکە لە کێشەکان و پەیوەندی مرۆیی و دیپلۆماسی کێشەیەکی دیکە.

 هۆشیار زێباری باوەڕی وایە پێویست دەکات ڕاستگۆیی لەمامەڵەکردنی نێودەوڵەتیدا لەڕێگەی دامەزراوەکانی دەوڵەتەوە هەبێت، بۆ ئەو مەبەستەش ئومێدەوارە چاسەرێک بۆ ئەم پرسانە بدۆزرێتەوە.