لە میسر سێ دیپلۆماتکاری قەتەری لە ڕووداوێکدا گیانیان لەدەستدا

ئاڤا نیوز

شەوی ڕابردوو سێ دیپلۆماتکاری قەتەر ی لە ڕووداوێکی هاتووچۆدا لە شاری شەرەم شێخی میسر گیانیان لەدەستدا، لە هەمان ڕووداودا دوو دیپلۆماتکاری دیکەی ئەو وڵاتەش برینداربوون.

وێنە گەورەکە: سبەی دووشەممە بە سەرپەرشتی دۆناڵد ترەمپ، سەرۆکی ئەمریکا و عەبدولفەتاح سیسی، سەرۆکی میسر  و بەبەشداری سەرکردەی زیاتر لە 20 وڵات، لوتکەی شەرەم شێخ بۆ ئاشتی بەڕێوەدەچێت، ئامانجیش لە لوتکەکە تاوتوێکردنی ڕێککەوتنی کۆتاییهێنان بە جەنگی غەززە و بەهێزکردنی ئاشتییە لە ڕۆژهەڵاتی ناوەڕاست، بۆ ئەو لوتکەیەش تیمی لۆجستی و پرۆتۆکۆلی وڵاتان گەیشتوونەتە شاری شەرەم شێخی میسر و ئامادەکاری بۆ گەیشتنی سەرۆک و سەرکردەی وڵاتەکانیان دەکەن.

ڕاگەیێنراوی فەرمی: باڵیۆزخانەی قەتەر لە میسر بڵاویکردەوە،  ئەوانەی لە ڕووداوەکەدا گیانیان لەدەستداوە کارمەندی دیپلۆماسی سەر بە دیوانی میری قەتەر بوون، هاوکات دوو دیپلۆماتکاری دیکەی وڵاتەکەشیان لە هەمان ڕووداودا برینداربوون.