حەماس: بەرەبەیانی دووشەممە بارمتەکان ئازاد دەکرێن

ئاڤا نیوز

ئامادەکاریی ئاڵوگۆڕی بارمتەکان دەستیپێکردووە و حەماس لەوبارەیەوە ڕایگەیاندووە، لە کاتی خۆیدا جێبەجێ دەکرێت.

لێدوانی فەرمی: ئوسامە حەمدان، بەرپرسێکی باڵای بزووتنەوەی حەماس، ڕایگەیاند، ئازادکردنی 48 بارمتە (زیندوو و مردوو) کە زۆربەیان ئیسرائیلین، لە غەززە سەرلەبەیانی ڕۆژی دووشەممە دەستپێدەکات ئەمەش بە گوێرەی ئەو ڕێککەوتنەیە کە کراوە.

نەزانراوەکان: باڵی سەربازی حەماس هێشتا هیچ زانیارییەکیان نەداوەتە سەرکردایەتیی گروپەکە سەبارەت بە ڕێکخستنەکانی جێبەجێکردنی ڕادەستکردنی بارمتەکان و هێشتا شوێنی ڕادەستکردنەکە دیار نییە.

لەلایەکی دیکەوە: بە گوتەی حەمدان، هێشتا هەموو شتەکان یەکلایی نەکراونەتەوە و ئیسرائیل "هاوکار نییە" بۆ بڵاوکردنەوەی هەندێک ناو. لە کاتێکدا بڕیار بوو تا ئێوارەی شەممە یان سەرلەبەیانیی یەکشەممە لەسەر لیستی کۆتایی ناوەکان ڕێکبکەون.