پێشەوا هەورامانی: ڕۆژی چوارشەممە ئەنجوومەنی وەزیران لەسەر دوو تەوەر کۆدەبێتەوە

ئاڤا نیوز

کۆبوونەوە ئاساییەکانی ئەنجوومەنی وەزیرانی هەرێمی کوردستان بەردەوام دەبێت، گوتەبێژی حکومەتی هەرێمی کوردستانیش دووپاتی دەکاتەوە، بانگەشەی هەڵبژاردن هیچ کاریگەری لەسەر کۆبوونەوەکانی حکومەت و ئەنجامدانی پرۆژەکان و خزمەتکردنی خەڵکی کوردستان نابێت.

چیرۆکی سەرەکی: ڕۆژی چوارشەممە 15-10-2025 کۆبوونەوەی ئاسایی هەفتانەی ئەنجوومەنی وەزیرانی هەرێمی کوردستان بەڕێوەدەچێت، تیایدا گفتوگۆی بارودۆخی دارایی و خەرجکردنی مووچەی مانگەکانی 2025 و ستراتیژی نیشتمانی پێنج ساڵەی بەهێزکردنی سەروەری یاسا دەکرێت.

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان بە ئاڤا میدیای ڕاگەیاند: بەڕێوەچوونی بانگەشەی هەڵبژاردن بۆ پەرلەمانی عێراق هیچ کاریگەرییەکی لەسەر ئەنجامدانی کۆبوونەوەی ئەنجوومەنی وەزیران نابێت و حکومەت بەردەم دەبێت لە ئەنجامدانی کۆبوونەوە و پڕۆژە و کاری گرنگ بۆ خزمەتی هاووڵاتییان، ڕۆژی چوارشەممە حکومەتی هەرێمی کوردستان لەسەر دوو تەوەری گرنگ کۆدەبێتەوە.

زانیاریی زیاتر: بەرنامەی کاری کۆبوونەوەی ئەنجوومەنی وەزیران لەم هەفتەیەدا دوو بڕگە دەبێت:- 

بڕگەی یەکەم: خستنەڕووی دەرئەنجامی پێداچوونەوە و هەڵسەنگاندنی بارودۆخی دارایی هەرێمی کوردستان کە لە ماوەی پێشوودا ئەنجامدرا لەلایەن وەزارەتی دارایی و ئابووری لەسەر ڕاسپاردەی دوا کۆبوونەوەی ئەنجومەنی وەزیران، و بەدواداچوونی ئەنجومەنی وەزیران بۆ هەنگاوەکانی خەرجکردنی مووچەی مانگەکانی ساڵی 2025،ئەم بڕگەیە لەلایەن بەڕێز وەزیری دارایی و ئابووری و شاندی دانوستانکار دەخرێتەڕوو بۆ ئەنجوومەن.

بڕگەی دووەم: خستنەڕووی ستراتیژییەتی نیشتمانیی پێنج ساڵە 2025-2029 ( بۆ بەهێزکردنی سەروەریی یاسا و چەسپاندنی دادپەروەری لە عێراق و هەرێمی کوردستان، بە مەبەستی تاوتوێکردن و پەسەندکردنی لەلایەن ئەنجومەنی وەزیران. ئەم ستراتیژیەتە بە هەماهەنگی لە نێوان هەردوو وەزارەتی دادی حکومەتی هەرێم و حکومەتی فیدراڵی گەڵاڵە کراوە.