سەدر: نیگەرانین لە خیانەتی دوژمن

ئاڤا نیوز

ڕێبەری ڕەوتی نیشتمانیی شیعە، نیگەرانیی خۆی لە خیانەتکردنی ئیسرائیل لە ڕێککەوتنی ئاگربەست لە کەرتی غەززە دەربڕێت و چارەسەری دوو دەوڵەتیش بۆ فەلەستین ڕەتدەکاتەوە.

وێنە گەورەکە: دوای دووساڵ لە جەنگ، دواجار بەرەبەیانی ڕۆژی پێنجشەممە 9ـی تشرینی یەکەم، دۆناڵد ترەمپ، سەرۆکی ئەمریکا گەیشتن بە ڕێککەوتنی کۆتاییهێنان بە شەڕی نێوان ئیسرائیل و حەماسی ڕاگەیاند.

پەیامی فەرمی: موقتەدا سەدر، ڕێبەری ڕەوتی نیشتمانیی شیعە، لە پۆستێکیدا لە تۆڕی "ئێکس" نووسیویەتی: "دوای ئەوەی ترەمپ و هاوبەشە تیرۆریستەکەی نەتانیاهوو ناچار بوون ئاگربەست ڕابگەیەنن، بە تایبەتی دوای ئەو فشارە جەماوەرییە نێودەوڵەتییانەی کە هاوپەیمانەکانیان تووشی بوون، هیوادارین براکانمان لە (غەززە) بە سەربەرزی و سەلامەتی بژین و یارمەتییە مرۆییەکان بە زووترین کات پێیان بگات.

مەترسییە پێشبینكراوەكان: سەدر دەشڵێت: "لە هەمان کاتدا نیگەرانین لە خیانەتی دوژمن بە دووبارە دەستپێکردنەوەی تیرۆر و فراوانکردنی مەودای جەنگ و جێبەجێکردنی بیرۆکەی کۆچپێکردنی زۆرەملێ و پرسی چارەسەری دوو دەوڵەت، دوژمن پەیمان و گەرەنتی نییە، فەلەستین 'لە ئاوەوە بۆ ئاو'ـە و پایتەختەکەشی قودسی شەریفە".