بەمزووانە سەرۆکوەزیران مەسرور بارزانی پڕۆژەیەکی ستراتیژی لە سنووری هەولێر دەکاتەوە

ئاڤا نیوز

کۆتاییەکانی ئەم مانگە سەرۆکوەزیران مەسرور بارزانی پڕۆژەیەکی ستراتیژیی لە سنووری پارێزگای هەولێر دەکاتەوە و دەیان هەزار هاونیشتمانی لێی سوودمەند دەبن.

وێنە گەورەکە: چەند ساڵێکە قەزای قوشتەپە، ناحیەی بێستانە و گوندەکانی دەوروبەری بەدەست کەمئاوەییە دەناڵێنن، ساڵی ڕابردوو قوشتەپە ژمارەی پێوانەیی لە کەمکردنی ئاوی ژێر زەوی لەسەر ئاستی کوردستان و عێراق تۆمار کرد، قووڵی بیرێک لە سنوورەکە گەیشتە 700 مەتر، بۆیە کابینەی نۆیەم بە جێبەجێکردنی پڕۆژەی ئاوی قوشتەپە لەسەر زێی بچووک، ناوچەکە لە کەمئاوی ڕزگار دەکات.

لێدوانی فەرمی: ئاری ئەحمەد، بەڕێوەبەری ئاو و ئاوەڕۆی هەرێمی کوردستان بە ئاڤای ڕاگەیاند: زیاتر لە 90%ـی کارەکانی پڕۆژەی ئاوی قوشتەپە تەواو بووە، پڕۆژەکە لە کۆتاییەکانی ئەم مانگە لەلایەن سەرۆکووەزیران مەسرور بارزانییەوە دەکرێتەوە، هێڵی یەکەمی پڕۆژەکە دەست بە ناردنی ئاو دەکات و سنووری قەزای قوشتەپە، ناحیەی بێستانە و گوندەکانی ناوچەکە لە کێشەی کەمئاوی ڕزگاریان دەبێت. 

ئەوەی پێویستە بیزانیت: پڕۆژەکە لە کاتژمێرێکدا سێ هەزار مەتر سێجا و 72 هەزار مەتر سێجا لە ڕۆژێکدا دابین دەکات، پێویستیی ئاوی سنوورەکە نزیکەی هەزار و 850 مەتر سێجایە و بەمەش زیاتر لە هەزار مەتر سێجای پڕۆژەکە زیاد دەبێت، هەروەها نزیکەی 200 بیری سنوورەکە دەکوژێنەوە و ناوچەکە لە گرفتەکانی کەمئاوی ڕزگاری دەبێت.

زانیاریی زیاتر: پڕۆژەکە بە پێنج قۆناغ جێبەجێ دەکرێت، بە تەواوبوونی ئاو دەگاتە سەنتەری قەزای قوشتەپە، ناحیەی بێستانە و زیاتر لە 70 گوندی سنوورەکە.

باکگراوند: پڕۆژەی ئاوی قوشتەپە یەکێکە لە پڕۆژە ستراتیژیەکانی کابینەی نۆیەم، ڕۆژی 2024-09-17، مەسرور بارزانی، سەرۆکوەزیرانی کوردستان، بەردی بناغەی پڕۆژەکەی دانا و گوژمەی پڕۆژەکەش 222 ملیار دینارە.