سەرۆک بارزانی: بوونی عەرەب و تورکمان لە لیستی پارتی، هێزی پارتی دەپارێزێت

ئاڤا نیوز

لە بانگەشەی پارتی بۆ هەڵبژاردنی پەرلەمانی عێراق، سەرۆک بارزانی پەیامێکی گرنگی ئاراستەی کاندید و لایەنگرانی پارتی کرد و بە تایبەت جەختی لەسەر فرەڕەنگی لیستی ژمارە 275ـی پارتی کردەوە، بوونی کاندیدانی عەرەب و تورکمانی بە نیشانەی ڕێبازی دروستی حیزب و زیادبوونی هێزی پارتی ناوبرد.

چیرۆکی سەرەکی: ئەمڕۆ یەکشەممە، 12-10-2025، لە شاری هەولێر بە ئامادەبوونی سەرۆک بارزانی و هەریەک لە نێچیرڤان بارزانی و مەسرور بارزانی، پارتی دیموکراتیی کوردستان بە فەرمی بانگەشەی هەڵبژاردنی دەستپێکرد. سەرۆک بارزانی داوای لە کاندیدانی پارتی کرد پێکەوە کار بکەن بۆ بەرگریکردن لە مافەکانی گەلی کوردستان و هەروەها مافەکانی هەموو تاکێکی عێراقی لە سەرجەم پارێزگاکاندا.

پەیامی فەرمی: سەرۆک بارزانی لە پەیامەکەیدا ڕایگەیاند: "زۆر دڵخۆشم بە بینینی ژمارەیەکی بەرچاو لە برایان و خوشکانی عەرەب و تورکمان لەناو لیستی 275ـی پارتی دیموکراتی کوردستان. ئەم بوونە جەخت لەسەر بنەماکانی حیزبەکەمان دەکاتەوە و هێزێکی زیاتر بە پارتی دەبەخشێت، هەروەها ڕەنگدانەوەی ڕێبازی دروست و گشتگیرانەی پارتی دیموکراتی کوردستانە."

لەهەمان کاتدا: سەرۆک بارزانی داوای لە سەرجەم کاندیدەکان کرد کە یەکڕیز بن و پێکەوە کار بکەن. وتی: "بوونی ئێوە لەم لیستەدا، هێزێکی دیکە دەداتە هێزی پارتی دیموکراتی کوردستان. داواتان لێدەکەم هەمووتان پێکەوە کار بکەن بۆ بەرگریکردن لە مافەکانی گەلی کوردستان و هەروەها مافەکانی هەموو تاکێکی عێراقی لە سەرجەم پارێزگاکان و ناوچەکاندا. دەبێت خۆتان بە نوێنەری هەموو عێراق بزانن، نەک تەنیا هەرێمی کوردستان."

لە بەردەوامی پەیامەکەیدا، سەرۆک بارزانی هیوای سەرکەوتنی بۆ سەرجەم کاندیدەکان خواست و دووپاتیکردەوە کە گرنگترین ئامانج بریتییە لە بردنەوەی گشتیی لیستەکە و گوتی: "هیوای سەرکەوتن بۆ هەمووتان دەخوازم. هەمووتان خۆشەویستن و برا و خوشکی ئێمەن، بەڵام گرنگ ئەوەیە لیستی 275 بە گشتی سەرکەوێت. چونکە ئەگەر لیستەکە سەرکەوت، واتە هەمووتان سەرکەوتن، بۆیە با سەرنجمان لەسەر بردنەوەی لیستەکە بێت جگە لەوە، سەرکەوتنی هەر یەکێک لە ئێوە بۆ ئێمە هەمان شتە، هەمووتان یەکسانن و هەمووتان خۆشەویستن."