نۆژه‌نكردنه‌وه‌ى یاریگای فرانسۆ هەریری له‌ هه‌ولێر تەواو بوو

ئاڤا نیوز

کاری نۆژەنکردنەوە و دانانی چیمەنی نوێ بۆ یاریگای فرانسۆ هەریری لە شاری هەولێر کۆتاییهات و ئەندازیاری پڕۆژەکەش کە کوردێکی دانیشتووی ئەوروپایە دەڵێت، ئەگەر بە باشێ خزمەت بکرێت، چیمەنەکە بەرگەی 12 ساڵ دەگرێت.

چیرۆکی سەرەکی: دوای نۆ شەو و ڕۆژ کارکردنی بەردەوام، پڕۆژەی دانانی چیمەنی نوێی یاریگای فرانسۆ هەریری لە هەولێر تەواو بوو. بەپێی زانیارییەکان، ئەم چیمەنە ئێستا بە باشترین چیمەنی یاریگاکانی کوردستان و عێراق دادەنرێت و هاوشانی یاریگاکانی ئەوروپایە بۆ یاریکردن.

کارکردن لە دانانی چیمەنی یاریگای فرانسۆ هەریری لەلایەن شارەزایەکی کوردی دانیشتووی هۆڵەندا بە ناوی سەڵاح محەممەد ئەنجامدراوە. کە نزیکەی 20 ساڵە لە بواری دانانی چیمەنی یاریگادا کار دەکات و ئەزموونێکی زۆری هەیە، چیمەنی چەندین یاریگای گەورەی ئەوروپی داناوە، لەوانەش، یاریگای یانەکانی بایرن میونخی ئەڵمانی، پاریس سانجێرمانی فەرەنسی، مانچستەر سیتی ئینگلتەرا و بروسیا دۆرتمۆندی ئەڵمانی. پێشتر چیمەنی یاریگای دهۆکیشی داناوە.

لێدوانی فەرمی: سەڵاح محەممەد بە ئاڤای ڕایگەیاند: "ئەگەر بە باشی ئاو بدرێت و ڕۆژانە چاودێری بکرێت و خزمەت بکرێت، چیمەنەکە بەرگەی 12 ساڵ دەگرێت." هەروەها جەختی لەوە کردووەتەوە کە کەشوهەوای کوردستان زۆر لەبارترە بۆ مانەوەی چیمەنەکە بەراورد بە کەشوهەوای ئەوروپا.

ئەوەی پێویستە بیزانیت: پڕۆژەی نۆژەنکردنەوەی یاریگای فرانسۆ هەریری، دیاریی مەسرور بارزانی، سەرۆکوەزیرانی هەرێمی کوردستان بوو بۆ یانەی هەولێر، کە بڕی یەک ملیار و 830 ملیۆن دیناری بۆ تەرخان کراوە.

لەلایەکی دیکەوە: سەبارەت بە پرسی کردنەوەی یاریگاکە، جێماو کاڕەش، ئەندامی دەستەی کارگێڕی یانەی هەولێر بە ئاڤای ڕایگەیاند: "ئامادەکاریمان کردووە 25ـی ئەم مانگە یاریی تێدا بکەین بەرامبەر یانەی شورتە."