لە کەرکووک جووتیارانی کورد و تورکمان دژی بڕیارێکی وەزارەتی بەرگریی عێراق خۆپیشاندان دەکەن

ئاڤا نیوز

کێشەی زەویی جووتیاران لە کەرکووک دیسانەوە سەریهەڵدایەوە، کاتێک ئەمڕۆ ئێوارە ژمارەیەک لە جووتیارانی کورد و تورکمانی گوندی تۆپزاوا و ناوچەکانی دیکەی سنووری شارەکە، دژی بڕیارێکی وەزارەتی بەرگریی عێراق خۆپیشاندانیان ئەنجامدا. خۆپیشاندەران تایەیان سووتاند و ئاگریان لەسەر شەقامی سەرەکی کەرکووک - بەغدا (شەقامی فڕۆکەخانە) کردەوە، بەو هۆیەشەوە ڕێگاکە بۆ ماوەیەک داخرا و ئاڵۆزی دروست بوو.

چی ڕوودەدات: جووتیاران جەخت لەوە دەکەنەوە کە ئەو زەوییانە دەکەونە سنووری ماددەی 140ـی دەستووری عێراق و یاسا دەرچووەکان جەخت لەوە دەکەنەوە کە نابێت کار بە بڕیارەکانی ڕژێمی پێشووی بەعس بکرێت، بەڵام وەزارەتی بەرگری هێشتا کار بەو بڕیارانە دەکات. ئەو گوند و ناوچانەی کە وەزارەتی بەرگری داوایان دەکات بریتین لە، بڵاوە، تسعینی کۆن، تۆپزاوا، ترکلان و دیبەگ تەپە.

زانیاریی بەدەستهاتوو: ساتع ناسیح، نوێنەری جووتیارانی تۆپزاوا، بە ئاڤای ڕاگەیاند، لیژنەیەک لە وەزارەتی بەرگریی عێراق سەردانی ناوچەکەی کردووە و دەستیان بە ڕووپێویی زەوییەکانیان کردووە. ناسیح ئاماژەی بەوەدا کە لیژنەکە داوای لە جووتیاران کردووە فۆڕمێک پڕبکەنەوە، کە یەکێک لە خاڵەکانی فۆڕمەکە ئەوەیە "جووتیارانی کورد و تورکمان لەسەر زەویی تەجاوز خانوویان دروست کردووە"، گوایە ئەو زەویانە موڵکی وەزارەتی بەرگریی عێراقن.

لەلایەکی دیکەوە: جووتیارێکی دیکەش کە نەیویست ناوی ئاشکرا بکرێت، بە ئاڤای ڕاگەیاند کە بە پڕکردنەوەی فۆڕم وازیان لێ ناهێنن، بەڵکوو داوایان لێدەکەن خانووەکانیان چۆڵ بکەن، بە بیانووی ئەوەی کە لەسەر زەویی موڵکی وەزارەتی بەرگری نیشتەجێن.

دوای ماوەیەکی کەم لە ئاگرکردنەوە و گرتنی ڕێگاکە، هێزە ئەمنییەکانی کەرکووک گەیشتنە شوێنی ڕووداوەکە و بڵاوەیان بە خۆپیشاندەرانیان کرد.