تاڤگە عومەر: كۆمیسیۆنی باڵای مافەكانی مرۆڤ لە عێراق پەكخراوە

ئاڤا نیوز

بەڕێوەبەری گشتیی فەرمانگەی یاسا و پاراستنی مافەكانی مرۆڤ هەرێمی كوردستان ڕایدەگەیێنێت، كۆمیسیۆنی مافەكانی مرۆڤی سەر بە نەتەوەیەكگرتووەكان كۆمەڵێك تێبینییان لەسەر دۆخی مافەكانی مرۆڤ لە عێراقدا هەیە بەتایبەت لە پرسی ژنان، منداڵ و ئازادیی ڕۆژنامەنووسی. دووپاتیشی دەكاتەوە، ئەزموونی سەركەوتووی هەرێمی كوردستان لە پاراستنی مافەكانی مرۆڤ، بەهیچ جۆرێك بەراوردی عێراق ناكرێت.

چیرۆکی سەرەکی: تاڤگە عومەر، بەڕێوەبەری گشتیی فەرمانگەی یاسا و پاراستنی مافەكانی مرۆڤ هەرێمی كوردستان كە ئێستا كاندیدی ژمارە 9 ـی پارتی دیموكراتی كوردستانە لە بازنەی سلێمانی بۆ هەڵبژاردنی ئەنجوومەنی نوێنەرانی عێراق بەشداری بەرنامەی گفتوگۆی هەڵبژاردنی ئاڤای کرد و تیشکی خستە سەر دۆخی مافەکانی مرۆڤ لە عێراق.

لێدوانی فەرمی: تاڤگە عومەر، ڕایگەیاند، لە پەرلەمانی عێراق جۆرێك مامەڵە و كڕین و فرۆشتن بەو یاسانەوە دەكرێت كە پەیوەستن بە مافەكانی مرۆڤ، بە نموونە؛ سوننەكان لەبەرامبەر تێپەڕاندنی هەمواركردنەوەی یاسای باری كەسێتی و پاڵپشتیكردنی لە بەرژەوەندیی شیعەكان، داوای دەركردنی یاسای لێبوردنی گشتییان كرد، كە هەردوو یاسا چەندین پێشێلكاریی ئاشكرای تێدایە بۆ سەر مافەكانی منداڵان و خانمان.

زانیاریی زیاتر: تاڤگە عومەر ئاماژەی بەوەشكرد، بەپێی دوایین ڕاپۆرتی ڕاسپاردەكانی كۆمیسیۆنی مافەكانی مرۆڤی سەر بە نەتەوەیەكگرتووەكان لەسەر دۆخی مافەكانی مرۆڤ لە عێراق، چەندین تێبینی لەسەر ڕەوشی نادروستی ئافرەتان، منداڵان و میدیاكاران هەن كە عێراق كەمتەرخەم بووە لە چارەسەركردنیان، بەپێچەوانەوە هەرێمی كوردستان پابەندی زۆربەی زۆری ڕاسپاردەكان بووە و ئەزموونی سەركەوتووی هەرێمی كوردستان لەم ڕووەوە، هەرگیز بەراوردی عێراق ناكرێت.