شەش شوێنەواری مێژوویی ئامێدی نۆژەن دەكرێنەوە

ئاڤا نیوز

ڕێكخراوێكی شوێنەوارناسی فەرەنسی، ئەركی نۆژەنكردنەوەی شەش شوێنەواری مێژوویی ئامێدی دەگرێتە ئەستۆ، بەڕێوەبەری شوێنەوار و كەلەپووری دهۆكیش دەڵێت، نۆژەنكردنەوەی ئەو شوێنەوارانە، سێكتەری گەشتیاریی دەڤەری ئامێدی دەباتە قۆناغێكی گەشەسەندووتر.

چیرۆكی سەرەكی: بەڕێوەبەرایەتیی گشتیی شوێنەوار و كەلەپووری پارێزگای دهۆك، گرێبەستی ڕێگەپێدانی پڕۆژەی نۆژەنكردنەوەی شەش شوێنەواری قەزای ئامێدی لەگەڵ ڕێكخراوی 'ئێكس پرێتیس فڕانس' واژۆ كرد، كە لە دیارترین شوێنەوارە مێژووییەكانی ئەو دەڤەرەن.

لێدوانی فەرمی: د. بێكەس بریفكانی، بەڕێوەبەری گشتیی شوێنەوار و كەلەپووری دهۆك بە ئاڤای ڕاگەیاند، پرۆژەی نۆژەنكردنەوەی شوێنەوارەكانی قەزای ئامێدی، ماوەی ساڵێك دەخایێنێت و بەڕێوەبەرایەتیی شوێنەوار و كەلەپووری دهۆكیش سەرپەرشتیی كارەكانی ڕێكخراوە فەرەنسیەكە دەكات لەو ماوەیەدا.

زانیاریی زیاتر: ئەو شوێنە مێژووییانەی كە بڕیارە نۆژەن بكرێنەوە، ئەمانەن؛ قوتابخانەی قوبەهان، مزگەوتی گەورەی ئامێدی، كەنیسەی كلدان، گۆڕستانی میران، كۆڕا سیریچی و گۆڕی پیرحەزان .

ئەوەی پێویستە بیزانیت: لە هەرێمی كوردستان نزیكەی پێنج هەزار شوێنەواری مێژوویی و شوێنی كولتووری هەن كە دووهەزار و 700 لەو شوێنەوارە مێژووییانە، كەوتوونەتە پارێزگای دهۆك، بەمەش پارێزگای دهۆك پێشەنگی سەرجەم پارێزگاكانی هەرێمی كوردستان و عێراقە لە زۆری ژمارەی شوێنەوار و لەڕووی گەشتیارییەوە سوودێكی زۆری بەو دەڤەرە گەیاندووە.