قاسم ئەعرەجی: پارە بۆ تیرۆریستانی داعش لە کەمپی هۆل دەگوازرێتەوە

ئاڤا نیوز

ڕاوێژکاری ئاسایشی نیشتمانیی عێراق، هۆشداری لەبارەی چالاکییەکانی ڕێکخراوی داعش لە کەمپی هۆل لە سووریا دەدات و دووپاتی دەکاتەوە کەمپی هۆل سەرچاوەیەکی گرنگی مرۆییە بۆ داعش و پێویستی بە هەوڵی هاوبەشی نێودەوڵەتی هەیە بۆ کۆتاییهێنان بەو دۆخەی هەیە.

وێنە گەورەکە: کەمپی هۆل، گەورەترین کەمپی ژن و منداڵی خێزانەکانی داعشە لە ڕۆژئاوای کوردستان، بەگوێرەی نوێترین ئامارەکان، ئێستا زیاتر لە 30 هەزار کەسی تێدا ماوە، تا ئێستاش عێراق توانیویەتی 18 هەزار و 800 هاووڵاتی خۆی بگەڕێنێتەوە وڵاتەکە.

لێدوانی ڕۆژنامەوانی: قاسم ئەعرەجی، ڕاوێژکاری ئاسایشی نیشتمانیی عێراق لە میانەی میوانداریکردنی لە پرۆگرامێکی کەناڵی سومەرییە، ڕایگەیاند، "داعش لەناو کەمپی هۆلدا جموجۆڵی هەیە و پارەی بۆ دەگوازرێتەوە و حکومەتی پێشووی سووریا و حکومەتی ئێستا کۆنترۆڵیان بەسەردا نەبووە"، ڕوونیشیکردەوە "ئەم کەمپە گەنجینەی مرۆیی داعش پێکدەهێنێت و هەندێک هەن پێیانوایە کە ئاوارەی ئاسایی تێدایە."

ئەوەی ئێستا ڕوودەدات: بە گوتەی ئەعرەجی، "هەوڵەکانی عێراق بۆ کۆتاییهێنان بە کەمپی هۆل و هەڵوەشاندنەوەی، پشتگیرییەکی نێودەوڵەتی باشی بەدەستهێناوە. وڵاتە گەورەکان بەڵێنیان بە بەغدا داوە لەم دۆسیەیەدا هاوکار بن و هانی وڵاتان بدەن بۆ گەڕاندنەوەی هاووڵاتیانیان لە کەمپەکەدا." هاوکات ئاماژەی بەوەدا "عێراق چەندین منداڵی لە کەمپی هۆل لەدایکبووی ڕەوانەی وڵاتانی بیانی کردووە."

لەلایەکی دیکەوە: ڕاوێژکاری ئاسایشی نیشتمانیی عێراق ئاماژەی بەوەشدا "داعش لە ڕووی سەربازییەوە تێکشکێنراوە، بەڵام هەندێک پاشماوەیان لە هەندێک دۆڵ و ئەشکەوتدا هەن، دەزگا ئەمنییەکان چاودێرییان دەکەن و بە هاوکاری لەگەڵ هاوپەیمانی نێودەوڵەتی لەناویان دەبەن".

ئەوەی پێویستە بیزانیت: 26ـی ئەیلوولی 2025، کۆنفرانسێکی نێودەوڵەتی لە بارەی گەڕاندنەوەی هاووڵاتیانی وڵاتان لە کەمپی هۆڵ و ناوچەکانی دەوروبەری، لە بارەگای نەتەوەیەکگرتووەکان لە نیویۆرک بەڕێوەچوو. ئەم کۆنفرانسە بە هاوکاریی عێراق و نووسینگەی نەتەوەیەکگرتووەکان بۆ بەرەنگاربوونەوەی تیرۆر سازکرا.