ماددە خۆراکییەکان لە بەشەخۆراک زیاد دەکرێت و کوالێتییەکەشی بەرز دەکرێتەوە

ئاڤا نیوز

وەزارەتی بازرگانی عێراق زنجیرەیەک ڕێکار بە ئامانجی باشترکردنی سەبەتەی خۆراک دەگرێتەبەر و ئاماژەی بە زیادکردنی ماددەی خۆراکی نوێ و بەرزکردنەوەی کوالێتی ماددە خۆراکییەکان دەدات.

وێنە گەورەکە: مانگانە هاونیشتمانیان لە هەرێمی کوردستان و هاووڵاتیانی عێراق بە گشتی لە ڕێگەی بریکارەکانی خۆراک و ئاردەوە بەشەخۆراکی مانگانەیان وەردەگرن، بەڵام زۆرجار خەڵک گلەیی لە کوالێتی نزمی ماددە خۆراکییەکان و جۆری ماددە خۆراکییەکان هەیە.

لێدوانی فەرمی: محەممەد حەنوون، وتەبێژی وەزارەتی بازرگانی عێراق، لە لێدوانێکدا بە ڕۆژنامەی "سەباح"ـی ڕایگەیاند، "دۆسیەی پسوولەی خۆراک یەکێکە لە گرنگترین لەپێشینەکانی وەزارەت"، ڕوونیشیکردەوە "ئامانج ئەوەیە پسوولەی خۆراک تەنیا وەک ئامرازێک نەمێنێتەوە بۆ دابینکردنی خۆراک بۆ هاووڵاتیان، بەڵکو ببێتە پڕۆژەیەکی ئابووریی یەکگرتوو کە بەشدار بێت لە بەدیهێنانی ئاسایشی خۆراکیدا."

بەوتەی وتەبێژەکەی وەزارەتی بازرگانی، حکومەت بڕی سێ بۆ پێنج تریلیۆن دیناری لە چوارچێوەی بودجەی سێ ساڵیدا بۆ ئەم مەبەستە تەرخان کردووە.

زانیاریی زیاتر: حەنوون وتیشی، وەزارەت لە ڕێگەی پلانێکەوە هەوڵ دەدات "پشتیوانی لە پێکهاتەکانی پسوولەی خۆراک بکات و کوالێتی ماددە خۆراکییەکان باشتر بکات بە شێوەیەک کە هیچ بارگرانییەک لەسەر بودجەی گشتی دروست نەکات، لەگەڵ تیشک خستنە سەر بەدیهێنانی خوددابینکردن لە ڕێگەی بەهێزکردنی تواناکانی بەرهەمهێنان و کۆگاکردن و دابینکردنی ماددەکان لە ناوخۆدا بە ئەندازەی توانا."