کۆمیسیۆن دەست بە مەشقپێکردنی کارمەندی سندووقەکانی دەنگدان دەکات

ئاڤا نیوز

لە چوارچێوەی ئامادەکارییەکانی کۆمیسیۆنی باڵای سەربەخۆی هەڵبژادنەکانی عێراق، دەستی بە پڕۆگرامێکی مەشقپێکردنی بەرفراوان کرد بۆ زیاتر لە 230 هەزار کارمەندی سندووقەکانی دەنگدان، کە بڕیارە لە سێ قۆناغی مەشقپێکردندا بەڕێوەبچێت.

وێنە گەورەکە: کۆمیسیۆنی باڵای سەربەخۆی هەڵبژاردنەکانی عێراق بۆ بەڕێوەبردنی پرۆسەی هەڵبژاردن پێشتر ڕایگەیاندبوو پێویستییان بە زیاتر لە 250 هەزار کارمەند هەیە، لە ناوەڕاستی مانگی ئەیلوولی ڕابردووش تیروپشک بۆ کارمەندانی سەر سندووقی دەنگدان کرا.

ڕاگەیێنراوی فەرمی: بەگوێرەی ڕاگەیێنراوی کۆمیسیۆن " کۆمیسیۆن دەستی بە مەشقپێکردنی کارمەندانی سەر سندووقەکانی دەنگدان کرد، کە ژمارەیان زیاتر لە 230 هەزار کارمەندە و بە سێ قۆناغ ئەنجام دەدرێت. قۆناغی یەکەم ڕۆژی شەممە ڕێکەوتی 2025/10/11 دەستیپێکرد و پڕۆسەکە تا کۆتایی ئەم مانگە (تشرینی یەکەم) بەردەوام دەبێت".

لەهەمان کاتدا: کۆمیسیۆن ڕێنمایی تایبەتی ڕێکارەکانی دەنگدانی بۆ کارمەندانی سندووقەکانی دەنگدان ئامادە کردووە، بە ئامانجی دڵنیابوونەوە لە سەرپەرشتیکردنیان بۆ پڕۆسەی هەڵبژاردنەکان.

باکگراوند: بڕیارە  مانگی 11ـی ئەمساڵ هەڵبژاردنی خولی شەشەمی پەرلەمانی عێراق بەڕێوەدەچێت، کۆمیسیۆنی باڵای سەربەخۆی هەڵبژاردنەکانی عێراقیش بەردەوامە لە ئامادەکارییەکان بۆ ئەو مەبەستە.