ژمارەیەک سکاڵای یاسایی و ناوبژیوانی نێودەوڵەتیی لەبەرژەوەندی عێراق یەکلادەبێتەوە

ئاڤا نیوز

عێراق 32 سکاڵای یاسایی و ناوبژیوانی نێودەوڵەتیی کە لەماوەی سێ ساڵی ڕابردوودا لەدژی کرابوو دەباتەوە و بەهۆیەوە زیاتر لە 2.6 ملیار دۆلار بۆ گەنجینەی دەوڵەت دەگەڕێتەوە. 

چیرۆكی سەرەكی: بەهۆی لاوازیی داڕشتنی گرێبەستەکانی نێوان بەشێک لە وەزارەتەکانی عێراق و کۆمپانیای نێودەوڵەتیی، گەندەڵی لەهەندێک لەو گرێبەستانە و قەرزی دەرەکی، لەماوەی ڕابردوودا بەدەیان سکاڵا لەسەر حکومەتی عێراق لەدادگا نێودەوڵەتییەکان تۆمارکراوە. 

لێدوانی فەرمی: ئەحمەد لعێبی، گوتەبێژی فەرمی وەزارەتی دادی عیراق، ڕایگەیاند: کۆی گشتی ئەو سکاڵا یاساییانەی عێراق لە ساڵانی 2023 و 2024 و 2025دا بردوویەتییەوە، 32 سکاڵا بوون، بەمەش نزیکەی 2.65 ملیار دۆلار بۆ خەزێنەی دەوڵەت گەڕاوەتەوە، چونکە بەپێچەوانەوە دەبوایە عێراق بەو بڕە پارەیە قەرەبووی سکاڵاکارانی بکردایە.

زانیاری زیاتر: لعێبی ئاماژەی بەوەشکرد، گرنگترین و گەورەترین ئەو سکاڵایانەی عێراق بردوویەتییەوە، دۆسیەی کۆمپانیای "ئەی ئێچ جی" (AHG) بە بڕی ملیارێک دۆلار بووە و دۆسیەی ناوبژیوانی کۆمپانیای ئەجیلیتی کوەیتی بە بڕی 650 ملیۆن دۆلار بووە.

ئەمەش بزانە: گوتەبێژی فەرمی وەزارەتی دادی عیراق،  ناڕەزایەتی وەزارەتەکەی  بەرامبەر بە گرێبەستی نوێی هەندێک وەزارەت لەگەڵ ئەو کۆمپانیانەی کە سکاڵایان لە دژی عێراق تۆمارکردبوو دەربڕی و بە پێچەوانەی بڕیاری ئەنجوومەنی وەزیران سەبارەت بە پابەندبوون بە شێوازی گرێبەستی نێودەوڵەتی ناوی برد.