لە بازنەی هەڵبژاردنی دهۆک هیچ کاندیدێک سزا نەدراوە

ئاڤا نیوز

12 ڕۆژی بانگەشەی هەڵبژاردن بۆ پەرلەمانی عێراق تێپەڕیوە و تاوەکو ئێستا هیچ کاندیدێک لە دهۆک بەهۆی سەرپێچییەوە سزا نەدراوە.

لێدوانی فەرمی: خالد عەباس، بەرپرسی ئۆفیسی دهۆک بۆ هەڵبژاردنی پەرلەمانی عێراق بە ئاڤای ڕاگەیاند: بۆ هەڵبژاردنی ئەمجارەی پەرلەمانی عێراق، کاندیدەکان زیاتر لە هەر هەڵبژاردنێکی دیکە پابەندی ڕێنماییەکانی هەڵبژاردنن.

زانیاریی زیاتر: بە گوتەی خالد عەباس، تاوەکو ئێستا هیچ کاندیدێکی هەڵبژاردن بەهۆی سەرپێچییەوە سزا نەدراوە، هەر کاتێکیش شارەوانیی دهۆک ڕاپۆرتێکمان پێشکەس بکات و ئاماژە بە سەرپێچی هەر کاندیدێک بکات، ئێمە ڕێکارەکانمان بەرامبەر ئەو کەسە دەگرینە بەر.

لەلایەکی دیکەوە: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکان ڕایگەیاند: لە ماوەی بانگەشەی هەڵبژاردن 194 پیاو، 42 ئافرەت و 56 دروشمی جیاواز بەپێی ڕێنماییەکانی هەڵبژاردن سزا دراون.

ئەمەش بزانە: لە هەڵبژاردنەکانی ڕابردووی بازنەی هەڵبژاردنی دهۆک، بە بەردەوام پارتی دیموکراتی کوردستان زۆرینەی دەنگەکانی ئەو پارێزگایەی هێناوە.

باکگراوند: ڕۆژی هەینی، 2025-10-03 بانگەشەی هەڵبژاردنی پەرلەمانی عێراق دەسیپێکرد و بڕیارە تاوەکو 2025-11-08 بەردەوام بێت، کۆمسیۆن ڕێنمایی و شێوازی بانگەشەی دیاری کردووە، لەهەر بازنەیەکی هەڵبژاردن لە چوارچێوەی ڕێنماییەکانی کۆمیسیۆن ڕێنمایی و ڕێکاری پێویستە دەگرنەبەر.